五一勞動節小初周圍去勞動，即係四處收料，綜合多位融資界大佬嘅意見，假期前落實賣盤嘅科建（563）可能有得諗。
其中一位融資界年輕才俊話，今次買入科建嘅買家，係齊翔食品（735）董事之一，齊翔自從賣盤後，股價表現如何，相信唔使多講。
佢又話，新大股東本身相當年輕，但喺大陸網絡界則相當勁。自從科建舊年10合1併股，跟住2供1供股集資後，真係將街貨攤薄晒。
科建停牌前股價報9.5仙，以家陣發行股數8.76億股計，成隻殼都係值8千萬元多少少，所以要炒上真係唔多難。
科建今日復牌，即管睇吓表現如何，就知年輕才俊講嘢有幾堅。
講時講，今次負責單交易嘅財務顧問，係近排相當多事嘅國際融資（8004），真係諗唔到肥仔Dan哥哥同大檸檬鬥法之餘，重得閒分身做生意。
慕容小初