表面上是通宵食肆聚腳地的黃大仙環鳳街，原來是外省老店棲身之所。街頭24小時營業的潮菜館是家庭式經營，除供應大路潮汕美食外，鮮見小吃一一俱備，服務態度親切，他鄉遇故知更同聲同氣；拐彎直上是子承父業的川滬菜館，老闆和廚師們入廚幾十年，精煮家鄉小菜，亦不時引入新名目，就連粵菜也有幾款供應。兩老憑着款多價平，正宗風味，屹立不倒。
記者：楊一凡
攝影：周旭文
張老闆自言在香港經營食店，至緊要變通，不可幾十款家鄉小菜賣到老，不加入新菜豐富選擇，又點捱到𠵱家？
走油非無油，那其實是重要的烹調步驟之一，店方用老抽和糖扣元蹄，扣兩小時至入味，收到柯打後，燒滾油，給元蹄走油，其目的在於搶起「老虎皮」及豐富口感，元蹄表皮那深淺斑紋就是店主所說的老虎皮，仔細睇睇又係喎。你可選津白、通菜或白菜仔伴元蹄。
林先生夫婦試味：元蹄燜得好入味，外皮做得好特別，不似一般的滑潺潺，入口即滑落肚，呢款有些少𡁻頭。
擔擔麵質感爽滑，湯底香辣，味道正宗，份量較多，店主是四川人，堅持家鄉風味；老闆說豬管庭是大動脈，須用大火滾兩小時，烚到爽口，去掉雜味，然後切成百足咁樣，便可跟麻辣、花椒、辣椒、蒜茸及豆瓣醬同炒，兜兩兜便可上碟。
何生夫婦試味：擔擔麵個湯好精采，先香後辣，那種辣很吸引，會令你上癮；豬管庭勝在夠爽，炒得亦夠惹味。
菜式靈感源自廣東菜，重點是鮮味，先把長筒魷魚切成梳，即是表面看似切絲，其實背部相連沒有切斷，這樣蘸蛋漿，炸熟後就像花開一樣美，到了上枱時，才用鉸剪剪開，方便食用。
李小姐試味：魷魚好鮮甜，又不會韌，蘸茄汁及椒鹽吃就更惹味。
‧店名：美味齋
‧電話：23272692
‧地址：九龍鳳凰新村環鳳街19號地下
‧座位：130個
‧營業時間：晚上六時至凌晨3時
‧付款方法：只收現金
店主特地選用潮州的平頭鵝滷製，貪其皮光肉滑，不厚油，外皮易上色，內裏快入味，重八至十斤的平頭鵝，需烚一個小時左右，大鍋裏的滷汁是家傳之寶，合指一算已用了22年，回想當年初來甫到時，滷汁才不過十歲，如今已成馥郁芳香的「滷」大姐。
試味報告：鵝肉透着淡淡滷水芳香，連皮吃，油潤入味，蘸蒜泥醋，並不影響滷水香，還可減少油膩感。
用滾油煎熟蠔餅，使其兩面金黃香脆，煎炸美食好熱氣喎！所以潮州人用番薯粉撈蠔餅，煎出嚟的蠔餅，口感既煙韌，又無咁熱氣，享用完蠔餅後飲杯功夫茶，乜都消化晒。
試味報告：蠔餅油水十足很鬆化，蠔仔亦不帶沙粒，蘸魚露同吃，夠鮮味。
選擇質地較粉的芋頭，削皮切條，加白砂糖炒熟，炒成點先算靚呢？炒至遇熱溶了的白砂糖，均勻地黐實芋頭，這層砂糖衣帶點乾身，表面還要起沙，而沙糖粒是黐着芋身，高明嗎？遇上熟手廚師，就知嘞。
試味報告：芋頭軟綿芋香陣陣，砂糖衣酥甜得嚟，又添鬆化的口感。
‧店名：新豪潮州飯店
‧電話：23203826
‧地址：九龍鳳凰新村環鳳街12號地下
‧座位：約50個
‧營業時間：24小時營業
‧付款方法：只收現金