港股擺脫咗美股嘅影響，恒指上升136點，電訊股同地產股充當火車頭。中移動（941）升35仙，收25.55元。指數要做到好好睇睇，最重磅嘅藍籌必然會成為做嘢嘅對象。中移動升，遲吓點都會帶動聯通（762）。762呢排跑慢過中移動，值得趁低揸啲聯通Call輪。
聯通Call輪槓桿率細過中移動Call輪好多，交投亦較遜色，炒起上嚟點都冇中移動Call輪咁熱鬧。數據最靚嘅離唔開9094同9035，兩隻嘅槓桿率都喺4倍以上。正股要有大動作，恐怕唔易，但郁40仙，上到8元齊頭，機會唔細。正股有咁嘅升幅，揸兩隻Call輪大約可以賺2分錢利潤。
國浩（053）連升兩日，前日升60仙，昨日再升5仙，收43.20元。但兩隻Call輪9204同9238冇乜表現。9204兩日計埋冇升跌，9238則只有1仙進帳。
國浩Call輪玩唔過，尤其係9238。現價33仙，明年1月到期，溢價46.1%，槓桿率13倍。揸到尾計，望正股升46.1%，不切實際。9204溢價同槓桿率較9238合理，不過都係偏高。 章盛