品嘗法國菜守則一：「必須在高貴的地方進行」；守則二：「由前菜開始到湯、主菜，直至甜品為止」；守則三「……」，守舊死板的守則已經不合時宜，你絕對有權選擇在輕鬆自主的氣氛下歎一頓法國菜。餐廳的新任廚師在新菜牌上，發起了一場小小的法菜大革命，甚麼前菜、主菜、甜品來個大執位，梳乎厘做頭盤、海鮮湯作主菜、甜品份量加碼亦無任歡迎，打破傳統法菜嚴肅規律，讓客人更隨心所欲享受法式美食。
記者：莫麗嫦 攝影：伍慶泉 ImageGirl：Crystal
羊奶芝士黑菌梳乎厘$78
香煎甜酒鴨肝$158
燒羊仔腿伴小麥米$158
香煎鱸魚配香草青口汁$168
鮮蝦釀魷魚配紅椒汁$148
香煎鴨胸伴甜薯茸$148
香草鮮果湯$48
普羅旺斯魚湯$178
菊蒿苣芝士沙律$58
燜兔肉闊麵$108
芋夾脆餅伴白朱古力摩士配紅莓汁$55
甜品拼盤$108（二人份量）
頭盤都未食咁快上甜品？非也，呢款鹹食梳乎厘是廚師Roger自創菜式。先加入羊奶芝士及黑菌焗製梳乎厘，焗好後再加羊奶芝士於梳乎厘上再焗多一次，令芝士味由內至外散發出來。
羊奶芝士味道較羶，未必人人啱食；充滿芝士及黑菌味道的梳乎厘香而不膩，配搭一杯凍白酒就認真「梳乎」。
普羅旺斯湯做法流傳已久，是沿自多年前當地漁夫的地道製法，用賣不去的小魚及海鮮，與海水同煮成海鮮湯，在寒冷的冬天作暖身之用。湯料有青口、大蜆、蝦、鱸魚、海鱸及紅鰹魚，極之豐富，因而亦可由湯升格為主菜。
湯底用了各式海鮮熬製近三小時，鮮甜得令人難以忘懷；配料豐富得一個人未必食得晒，與人分享為上策。
用傳統牛肉湯底的做法，換上海鮮作主角，伴以牛油、白酒及青口同煮，做出來的青口汁料十分鮮味。鱸魚屬細型魚，去骨後必須連皮香煎保持魚身完整，亦同時令其入口更加香脆。
鱸魚煎香後較乾身，必須蘸汁料同食挽回失去的油份；青口雖然是配菜，但十分鮮甜，絕不能錯過。
前菜中的一道香煎鴨肝，份量之大可以媲美一道主菜，而且鴨肝較為油膩容易令人覺得飽滯，悶熱天氣下絕對可以因應胃口而變身成主菜。鴨肝用提子及甜酒製汁相伴，再加一片炸得脆卜卜的蓮藕薄脆，加強菜式的口感。
在酸甜的汁料輔助下，大大減低了鴨肝的油膩感；面層蓮藕薄脆平衡了香軟的鴨肝的口感，兩者在口中二合為一，極為合拍。
大廚所製的鴨胸比其他餐廳的略厚，只因他深感鴨胸片薄後少了份口感，少了中間半熟的軟熟感覺。大部份西餐都會以薯仔或南瓜作配襯，但大廚稍加創意，用了番薯茸代替，一反傳統。
鴨胸煎後香口兼鴨味濃郁，配埋用小紅莓做的汁酸甜醒胃；番薯與南瓜茸同樣香甜，但食後略嫌過份飽滯。
一人一份甜品對很多女士而言並不足夠，唔夠喉之外更加限制了款式，未能滿足甜品Fans的要求。有見及此，新菜牌中加了甜品拼盤，將原來四款分別是芋夾脆餅朱古力慕絲、朱古力餅、法式燉蛋及呍呢拿葩夫結合，成為份量與款式俱備的甜品拼盤。
四款甜品口味不同，次序最好淡味至濃味去品嘗，建議先嘗呍呢拿葩夫，然後再食芋夾朱古力慕絲及法式燉蛋，最後才品嘗香濃的朱古力餅。
電話：25228830
地址：金鐘太古廣場LG007號舖
營業時間：上午11時至午夜12時
座位：約170個
付款方法：現金或信用卡（Visa,Master,AE,Diners）