王敏德（Michael）早排去深圳出席「觀瀾湖恩尼艾斯中國挑戰賽」，佢重抽時間參觀觀瀾湖內嘅賽維納樓盤示範單位。
Michael唔單止對示範單位嘅布置非常有興趣，佢重對有關工作人員大爆閨房事，Michael話自己最鍾意瞓床邊嘅梳化，而太太馬詩慧（Janet）就成日將佢踢落床㖭。
馮仁昭前日打畀Janet，問佢係咪成日踢老公落床，Janet聽完就笑笑口話：「唔係，我諗Michael係講笑啫，我從來冇踢過佢落床。就算兩夫婦有拗撬，我都唔會唔畀佢返房瞓，我哋咁大個人，一定唔會咁做。」
不過Janet就話Michael的確有瞓梳化嘅習慣，佢話：「佢真係鍾意瞓梳化，因為佢細細個已養成一邊瞓梳化，一邊睇電視嘅習慣。Michael有時怕嘈住啲仔女瞓覺，佢都會走去客廳睇電視，佢睇睇吓都會攬住張被瞓着。」
台灣人氣組合F4成員仔仔周渝民，之前被揭有個女朋友，連帶佢就讀嘅學校中國技術學院亦曝光，結果引來一大班瘋狂仔仔歌迷日日去守候，重直接衝入班房捉住佢隻手。最搞笑係啲fans將部攝錄機畀仔仔嘅同學，叫佢哋幫佢拍低仔仔上堂嘅情況，據知仔仔已經搵緊學校，準備下學期轉校。
梁朝偉早排去泰國見白龍王，白龍王話偉仔今年出碟一定掂，偉仔即刻坐言起行，據知佢已經搵咗伍思凱幫佢做新碟。伍思凱日前重喺台灣話偉仔喺電影中嘅角色同現實嘅偉仔好唔同，所以佢幫偉仔做嘅新歌，一定強調偉仔真實同溫暖一面。
周星馳早前同一班師兄弟去咗南韓宣傳《少林足球》，原來同行嘅重有趙薇。趙薇除咗為套戲宣傳外，重趁機去咗漢城行街，估唔到途中遇到班熱情嘅fans，為免有麻煩，趙薇結果未行完街就返酒店。
無綫原本想搵方中信同王喜孭飛嘅《烈火雄心Ⅱ》，喺世界盃進行期間播出，力撼有線。但據聞無綫收到風話亞視暑期會播F4嘅《流星花園續集》，於是即刻將《烈Ⅱ》收起，等亞視嘅《流星花園續集》播出時至出街，實行狙擊亞視。
車婉婉噚日喺電視城拍攝《皆大歡喜》。佢一見記者就話：「我要平反呀，有報道話我係蒲友，又話我同個富家子ShermanLee拍拖，全部係流料。我咁啱先蒲一次，就話我係蒲友，我要明哲保身呀。至於Sherman就係我嘅朋友，我係無敵景筍盤，唔心急。」