昨日四位立法會議員──霍震霆、葉國謙、黃成智同李鳳英，難得有時間去參觀銅鑼灣中央圖書館同尖沙嘴歷史博物館。書庫中有好多孤本手抄明清古籍，連葉國謙伸手去摸，都俾黃成智開玩笑地喝住：「唔好亂掂！撞壞賠唔起！」原來好多書籍都係透過「文獻徵集」從市民手中取得，至今有成五萬本咁多。
入到香港文學資料室，館方人員介紹話全部都係本土作家出品。議員一聽「本土」兩個字就即刻好high，猛話最好配合埋最近提倡嘅「本土經濟」。霍大少好風趣咁話：「應該喺度賣埋雲吞麫就最完美。」葉國謙就好似唱雙簧咁：「咁就唔少得一邊飲絲襪奶茶一邊睇書！」真係唔知好嬲定好笑。不過我哋尊貴議員都不忘香港聲譽，霍大少好緊張最近有個調查結果，話香港青少年買衫多過買書。一聽館方人員話其實香港細路唔使買書，因為多數去圖書館借書，重話七百萬人口，一年借書多達四千五百萬本時，猛叫館長有責任出來向公眾澄清，原來香港青少年「唔係臘鴨」。
（圖）霍震霆（右）同葉國謙小心翼翼地捧住部孤本手抄書，因為有乜損壞隨時賠唔起。
E-mail：