香港車市MPV當道，不乏追捧者及買家；而綜觀多款熱賣車種之中，豐田Esima可謂一枝獨秀，若然用家想突出個人風格的話，呢部至新追加版嘅Estima，或許會切合到你嘅要求。皆因佢有至In、兼且入型入格嘅包圍配襯，加埋Racing懸掛同2002年至新款嘅音響組合，呢股誘惑你又怎能抗拒呢！
特約記者、攝影：張以中
新車售價：$369,000起
車輛提供：富利堡汽車（28776700）
除咗外觀吸引之餘，原來車廂三排八個座位，亦用上時款嘅雙色皮椅配搭，予人貼身富支持力外，重好有一份時尚美態；而半皮半桃木軚環，以及周邊嘅桃木配襯，亦見有一份豪邁感。新車除四門電窗、門邊電鏡及雙天窗配備外，重有原廠恒溫冷氣，以及至新2002年版嘅Sony高級音響組合，單係享受嘅觀感經已教人留有深刻印象呢！
呢部豐田Estima配備有至Top嘅3.0公升V6偈，性能表現毋庸置疑之餘，入口商重改換上一套TRD嘅Racing避震連彈弓，大大加強走彎嘅循迹性同支持力外，將車高下調更有利重心嘅分布，置身其中亦能有多一份穩妥同暢順感㖭！
響MPV界有長青樹美譽嘅豐田Estima，每月出車數量有增無減，想突出個人風格，車身包裝同裝飾可謂係不可或缺嘅項目；而呢部全新嘅Estima3.0V6型號，佢唔止裝有至新嘅全身包圍，重有High-tech嘅Xenon頭燈同聚焦霧燈，加埋雙列式尾定翼，以及一套TRD嘅Racing避震，單係造型經已係瞄頭十足啦！
優點：
響MPV車壇有長青樹美譽嘅豐田Estima，外形早給人有看膩嘅觀感，而呢套全新包裝卻帶來有獨特設計同新鮮感，重有多一份活力感㖭！
缺點：
造型跑意盎然，惟獨車廂並非以碳纖維裝飾，似有點不大配襯，而車身雙趟門亦稍欠電動配搭，未能盡如人意。