中貿林一位老友嘅寫字樓喺都爹利街律敦治中心，呢個中心有兩座寫字樓，律敦治大廈及帝納大廈。都爹利街係一條小橫街，平時幾清靜，律敦治中心喺街尾，更加安寧。但最近大廈嘅「人氣急升」，連續兩三日都有狗仔隊企喺大廈外，做乜鬼呢？
原來新聞人物謝霆鋒在此出入。中貿林話：「上星期四去探老友，咁啱得咁蹺，碰到謝賢、狄波拉、謝霆鋒企喺帝納大廈𨋢口密斟，後來謝霆鋒離去，成班攝影記者追住。等咗幾分鐘，謝賢狄波拉先至走，當然再冇人跟啦，佢兩個行到街口（大道中八號，前成報大廈）就轉入去邱淑貞老公嗰間時裝店I.T.，好好心機去睇衫喎。」
中貿林個老友講，呢間中心有好多律師，報紙報道話謝霆鋒聘用資深大律師清洪，而清先生就係在帝納大廈辦公，佢要同大律師商量，自然就吸引咗一班記者追隨。其實平時嗰度都有名人出入㗎，一樓幾間燈飾店、傢俬店、意大利設計師用品店都喺度，中貿林有一次就碰到方逸華好有閒情咁睇燈飾。香港做生意好奇，大把人爭住喺銅鑼灣、旺角開舖，但律敦治中心咁靜，一樓行人甚少，唔多就腳㖭，偏偏就有幾間高級店舖，好似唔憂做咁款，但係一間中價餐廳BigApple就停業好耐，個舖位仍然丟空，似乎愈高檔次嘅零售，愈係有抗衰能力。