有新一代賭后之稱的何超瓊，剛獲得2002年度「世界傑出女企業家」獎項，昨日出席公開活動時，一提到其前男友楊其龍已另結外籍模特兒新歡Ambra時，即刻面紅紅，並透露自己亦在等待緣份的到來。
昨日何超瓊（Pansy）往西寶城出席寶翠園樓盤宣傳活動，剛獲美國顧問公司TheStarGroup頒發2002年「世界傑出女企業家」榮譽的她，工作能力毋庸置疑。Pansy雖然是女強人，但記者昨日提及超瓊前男友楊其龍已找到外籍模特兒新女友Ambra時，Pansy即面紅耳赤，未知她是對楊其龍仍未忘情，或純粹是怕醜。
昨日問Pansy目前感情生活如何時，她答：「好好。」問她「好好」是否意指已有新男友，Pansy說「好好即是冇新男友。」提及楊其龍已找到新歡外籍女模Ambra時，Pansy即時面紅說：「呢啲嘢冇得咁計，感情嘅嘢要講緣份，冇得策劃。」
Pansy又否認因工作太忙而導致沒時間認識男友，並說：「唔關事，都係緣份問題。」記者問Pansy心目中可有人選時，她笑說：「我睇中邊個，你哋係咪幫我約佢先？」
澳博投得新賭牌後，賭場上個月即連輸幾日錢，更有一名賭客贏了三千萬元，對此，身為董事局成員兼有新一代賭后之稱的Pansy說：「我冇參與賭場嘅運作，只係董事局成員。其實我未正式喺賭場返工，亦有好幾個星期冇去賭場。我覺得贏輸唔應該日日計，應該計年結或者月結。」
Pansy亦否認賭場早前特意裝修改風水，她說：「賭場每一、兩年都會裝修一次，只係周期性維修同保養，同埋換個新招牌，根本冇必要專登為咗改風水而裝修，可能因為啱啱轉名，所以大家比較敏感。」
至於自己獲得「世界傑出女企業家」獎項一事，Pansy說：「我覺得好榮幸，因為總共得四十個人獲獎，而且大部份係外國女性，華人得幾個。我冇因為攞獎而特別買禮物畀自己，反而啲朋友提過話同我食飯慶祝。」問其父親何鴻燊可有獎勵時，Pansy說：「佢係我老闆嚟，呢啲嘢唔使啦！」
採訪：汪正文
攝影：陳慧安