當各位開始活躍於戶外活動之時，各大牌子亦推出了很多新季的運動涼鞋。以往運動涼鞋多以實用功能為主打，款式十年如一日，顏色不離啡色、黑色、灰色，又深又沉非常納悶。不過今年有些品牌來個大革新，在講究功能之外，都追求色彩鮮豔、設計新穎，實行講款追潮流，以色突破傳統框框！
記者：許穗齡 攝影：林栢鈞 Model：AmyfromIMAGINE
嫌自己腳趾唔靚，唔想暴露於人前的話，今季一樣有合適的靚款給你選擇。好似呢款密頭露踭的adidas運動涼鞋，鞋面採用新款的丁字形設計，既可確保透氣度又唔使露趾，鞋面內層以透氣網面製，外面再加上橙色人造纖維以固定鞋形，再加上深橙色尼龍帶作點綴，成對鞋既新款又搶眼，硬炭膠的鞋底，抓地力強而且襟着。
尺碼：US4-10
售價：$550
（adidas）
今季嘅運動涼鞋款式選擇特別多，好似呢款由FILA出品嘅人字拖就係一個好例子，運動涼鞋選用人字拖設計夠特別，鞋身以深藍色為主，Logo及包邊則伴以粉藍色，充滿夏日色彩。其鞋頭位稍為向上彎，緊貼齊排腳趾，防止行山時腳趾踢到石頭，以魔術貼包緊後踭，以防甩「拖」，鞋底選用耐磨橡膠，時款又舒適，不論戶外活動或出街穿着都一樣咁有型。
尺碼：US5-9
售價：$279
（FILA）
驟眼睇以為FILA呢款應季運動涼鞋無乜特別，睇真啲才發現特別之處在於其雙重魔術貼的鞋帶設計，以反傳統磨砂橙色纖維做外層，內層則以軟身尼龍製，內外鞋帶均附有獨立魔術貼，雙重保護腳掌，一定唔會出現脫鞋現象，橡膠鞋底同樣耐磨及抓地力強。
尺碼：US7-11
售價：$299
（FILA）
傳統涼鞋的鞋身通常較鬆身，好處是易着易除，壞處是進行劇烈活動時會出現鬆脫或刮腳等現象。呢款由THENORTHFACE出品嘅新款涼鞋，鞋底以防滑橡膠製，鞋面則以一條尼龍帶設計，優點是可調校搭帶選擇適合自己的鬆緊度。講款式雖然唔算好特別，但粉紫色的搭帶卻非常搶眼，搭帶上還有一行黑色車線作點綴，襯粉色或白色運動服都咁好睇！
尺碼：5-9
售價：$425
（THENORTHFACE）
進行劇烈運動，腳部難免同鞋身有摩擦，所以小記買運動涼鞋時必定留意貼腳位置的質料。好似呢款TIMBERLAND嘅涼鞋，鞋面以淺啡色真皮製，內裏則用上一層夾棉尼龍，可承受腳部活動時的衝力，令腳部更舒適。
尺碼：US5-9
售價：$450
（TIMBERLAND）
鍾意攀山涉水嘅好動人士，對於普通運動涼鞋功能未夠滿意的話，相信呢對TIMBERLAND水陸兩用嘅涼鞋就啱晒你需求。鞋底選用纖維加橡膠外底，就算出入水面或陸地都唔怕跣腳，加埋鞋面的透氣耐用皮革網料，就算濕水都唔怕焗腳，絕對係專業之選。
尺碼：US7-11
售價：$590
（TIMBERLAND）
每日步行對腳所造成的壓力絕對非同小可，呢款TIMBERLAND嘅真皮涼鞋，就正是根據人體步行時腳掌所產生的壓力，而設計出BSFP的橡膠鞋底刻紋，特點是將壓力分散，減低腳掌因步行太久而產生的痠痛情況，最適合長時間穿着。
尺碼：7-13
售價：$650
（TIMBERLAND）
喜歡到海邊進行水上活動嘅朋友，當然唔少得一對沙灘拖，今季FILA推出一款雙色嘅沙灘拖，以鮮色透明膠作賣點，透明鞋面襯同色漸變鞋底，夠晒夏日感覺，最適合各位沙灘小子穿着。
尺碼：US4-12
售價：$149
（FILA）
今期NIKEACG嘅人字拖夠晒特別，以有細孔的人造纖維製造，令透氣度倍增，再加埋以紫色襯黑色膠底，夠晒時款，另外重備有橙色及黃色等鮮色以供選擇。
尺碼：US5-12
售價：$179
（NIKE）
adidas（27306685）
九龍尖沙嘴海港城2202店
FILA（25250051）
九龍塘又一城LG226號舖
TIMBERLAND（28950516）
銅鑼灣世貿中心G001-G002號舖
NIKE（23779660）
尖沙嘴栢麗大道地下33-34號舖
THENORTHFACE
查詢電話：27309009