繼《閣樓》話影到俄羅斯「美少女」古妮高娃裸照之後，我求大俠最近又睇到單關於佢嘅「筍嘢」。據《新浪網》引述俄羅斯專業新聞媒體《新聞在綫》講，古妮高娃喺一部叫做《如果只有網球》嘅科幻片擔正，戲中重有大膽露點演出。
話說片中描述地球喺世界大戰後，只剩番幾條村，又唔夠糧食，只有贏咗網球賽先得到食物。咁代表佢條村參賽嘅古妮高娃，喺賽前雖然發現戰衣被偷，但為咗村民有嘢食，一於半裸打波喎！咁嘅劇情實在荒謬之極，古妮高娃會唔會拍呢啲劇情近乎三級片嘅戲呀？另外，古妮高娃已經向《閣樓》採取法律行動，咁唔知佢會唔會告埋《新聞在綫》誹謗呢？
前日阿仙奴作客以二比○贏咗保頓之後，幾乎穩奪英超聯冠軍。場波嘅兩大入波功臣龍格保同埋韋托特，都好鍾意伸條脷出嚟。當然男人老狗咁做，其實有啲那個，不過𠵱家阿仙奴個勢咁好，球員興奮啲都不為過啫。
艾芬保早排話德國啲人懶，淨係識得攞公援，搞到俾拜仁雪咗兩場，但喺禮拜六嘅德甲聯煞科日佢獲解凍，可以踢對羅斯托克場波。事關嗰場波關乎拜仁攞唔攞到聯賽冠軍，點都要有個好似艾芬保咁有卡士嘅球員壓陣啩！
日本國家隊第一號龍門川口能活今屆當黑，除咗俾樸茨茅夫打入冷宮外，喺一月又俾英國警方捉到佢揸快車，要喺呢個月二十八號上庭，日本就會喺下月四號同比利時進行首場分組賽，我求大俠真係擔心佢連國家隊正選都保唔住。
周三皇馬同巴塞作生死戰，負責執法嘅意大利「光頭球證」哥連拿就要為自己面子而戰。話說佢早前被禁吹國內重要賽事，到禮拜日吹番場羅馬對基爾禾又冇判到迪維基奧嘅應入球，雖則話係助理裁判累佢，但佢始終有責任。光頭佬，今晚咪再衰啦！