總商會昨日開大會，鄭維志連任主席，怡和黎定基連任常務副主席，另外兩個副主席位，分別由滙豐艾爾敦同近日新聞多多之蔣麗莉出任，但八方在會場見唔到Lily蔣。
上次見佢腹大便便，話四月生得，可能現在坐緊月；而曾經收購太平洋興業之禹銘老闆馮永祥（佢係總商會理事，第日開會時大家見面，唔知會點呢？）亦有出現。有人問鄭主席太平洋興業事件發生之後，蔣是否適合做呢個副主席，鄭一招太極，話事件未有定案，唔肯評論。
至於理事成員，有田北俊、包立賢、陳永棋、張永霖、何禮泰、郭炳聯、李澤鉅、劉金寶和唐英年等一共二十一人。最新當選者係吳天海。
吳天海呢位九倉副主席，近年搞有線電視搞得有聲有色（除了工程部個電話成日冇人聽外），係吳光正的得力助手，佢在德國UniversityofBonn讀數學同經濟，估唔到去了做電訊。
吳天海八一年加入九倉，同年結婚，育有兩個仔，一個十五歲，一個十八歲。
（圖）九倉吳天海將有線電視搞得有聲有色，最近又上位當選總商會理事。
E-mail：