均來屯門茵翠豪庭賣咗一段時間，成績唔錯，而小欖愛琴灣亦都好快應市。均來戴耀華向蘭西透露，呢兩個樓盤，原來搵咗賴布衣一派高人睇過風水兼改名，對方重話，如果一年內賣唔晒，就唔收錢。愛琴灣月中會搞個狗展，重有明星做嘉賓。
由今日開始，5大地產代理行不再為一手新盤客戶，提供碌卡代買本票服務，今日重會齊集馬鞍山曉峯灣畔現場，舉行拆碌卡機儀式。美聯話會派出張錦成、葉潔儀同布少明等高層主持呢個儀式。
恒基嘅大角嘴港灣豪庭2期，前晚第二輪內購，利嘉閣話佢哋嘅市場佔有率達25%，贏咗同行；而買家中有四成係同區客，舊區嘅購買力果然大。
中原舊年搞咗個籌款活動，共籌到超過17萬元，為雲南大關縣團結村籌建「中原苗圃希望小學」。中原精英會5位核心幹事，響4月中親赴現場，驗收該座兩層高嘅小學，呢間學校可以提供130個學位。另外，中原精英會今個禮拜日舉行「第二屆踢走文盲盃慈善足球賽」，為內地學童籌募書簿費。
蘭西