南華中場李健和對多年好友山度士即將退休，感慨良多，他說：「我和阿山（山度士）同期出道，十四、五歲開始在銀禧（現體院）受訓，代表港隊到不同地方比賽，不經不覺已二十年；現在連佢都掛靴，同期出道的隊友只淨番我重踢緊，但我希望踢多一段時間，才考慮轉做教練。」
在「和仔」眼中，山度士是一個不可多得的天才中場球員，可惜在最當打的時候受重創影響成就，「和仔」說：「佢在青訓踢波時已經好醒，在中場觀察能力好強，又有遠射腳頭，可以話好過晒同期的隊友；而佢初踢甲組完全不怯場，已知他必定可成大器。可惜佢喺球員最當打的年紀，左膝十字韌帶受傷，被迫休戰兩季（九三至九五年），如果唔係呢次受傷，佢應該可以有更佳成就。」
「球員始終都有一日要退落嚟，既然山度士決定退休，轉向教練工作發展，身為多年戰友絕對支持。以佢嘅技術及多年經驗，轉向幕後教波，對球圈及年輕球員都是好事。」和仔說。