購物焦點:<br>百獸出籠動物圖案袋上爭霸

購物焦點:
百獸出籠動物圖案袋上爭霸

冬眠過後,踏入春夏季節,各大小動物又開始四出活動,森林內鬥個你死我活爭獵物搶地盤。今季爭霸戰場則移師至青春便服袋上,大頭老虎Sell氣焰、小白兔溫純可愛、貓仔惹人憐愛,重有其他不同圖案和風格嘅動物袋仔,爭住做手袋嘅封面。售價方面全部二百蚊以下有交易,不如一齊睇吓邊款啱自己心水!
記者:許穗齡
攝影:林栢鈞
ImageGirl:Mon

威嚴大頭老虎
森林中獅子老虎氣勢兇猛,無動物能與之匹敵,呢款牛仔布袋就正好表現出老虎兇猛威嚴的一面。側孭袋面印上老虎頭圖案,在圖案上再加一層帶金線的網面,下方更以毛毛皮製成TIGER英文字,加埋蛇皮圖案孭帶,夠晒狂野。
尺寸:長42cm、高32cm
售價:$199(Zaco)

迷人豬小姐
唔好以為小豬就係又肥又懶又臭,原來只要打扮一下,都可以好靚好有吸引力,好似呢款豬小姐中型手挽袋,以淺藍色皮為主,袋面則用上一幅印有身穿紗裙、頭戴金色假髮的小豬肖像,當堂成個淑女咁,帶住佢出街一啲都唔失禮。
尺寸:長34cm、高24cm
售價:$199(Zaco)

可愛睡貓貓
如果你同小記一樣最愛貓貓,不妨考慮吓呢款印有貓樣的小手袋。袋身以粉紅色皮製,袋面則印有一對小貓貓,兩口子同睡於一個小盆內,雙目緊閉,樣子甜美可愛,而袋內更附有長孭帶,當斜孭袋用都一樣無問題。
尺寸:長24cm、高14cm
售價:$169(Zaco)

紅粉千象布袋
要睇到宏偉壯觀嘅野生動物場面,唔一定要睇國家地理雜誌先得,呢款印有千象圖嘅布袋就可以滿足到你。呢個袋用棉布製造,以粉紅色作底色,袋面再分別印上桃紅色、啡色、白色、黑色等大象形態,設計時款,又啱晒近年玩嘅LogoFeel。
尺寸:長38cm、高25cm
售價:$139(新之助)

鹿仔保齡球袋
嫌貓貓狗狗袋太普通無新意,可以考慮呢款鹿仔圖案保齡球袋,袋身以藍色尼龍布製,印滿鹿形的圖案,再以白色皮做底部、手抽位及包邊,顏色配搭清新舒服,再加埋一個鹿形皮扣,更添活潑感。
尺寸:長34cm、高20cm
售價:$180(ART)

頸箍狗仔活潑跳脫
呢款深藍色牛仔布袋,袋面的拼貼小狗圖案,狗迷必定愛不釋手。連袋更有同款狗仔頭散銀包,以鐵鏈掛於袋邊,既可作陪襯又夠晒實用。小記覺得最特別的,是其紅色孭帶,設計就好似狗仔戴嘅頸箍,非常盞鬼!
尺寸:長35cm、高20cm
售價:$169(Zaco)

織花熊仔布袋
一般圖案袋多以印製為主,不過呢款熊仔側孭袋就與別不同,以棉線織出一隻隻熊仔圖樣,手工精細不在話下,每隻熊仔姿勢及動作不一,整體感覺夠晒可愛,又不會太過孩子氣,就算你是一名成熟型女士都啱用。
尺寸:長36cm、高27cm
售價:$198(ART)

溫馴毛毛兔
要數小動物的特徵當然離不開其身上的毛毛,好似呢款小兔手挽袋,就以一隻兔仔形狀為造型,粉紅色的毛毛又軟又滑,非常可愛。毛毛袋容量雖然小,不過就勝在夠的骰Cutie,襯埋件動物圖案衫就更正。
尺寸:長17cm、高19cm
售價:$90(HONEYB)





店舖資料
Zaco(23011328)
尖沙嘴加連威老道54號W地下

ART(23819611)
旺角旺角中心1樓F123B1舖

新之助(23322192)
旺角新天地3樓317舖

HONEYB(25060913)
銅鑼灣時代廣場9樓903號舖