抵食大牌檔：
啟業邨大牌檔一哥食客同捧避風塘茄子

客似雲來的大牌檔，全靠好味道去留住食客，價錢平、用料靚、招呼好和選擇多，都不如味道好來得印象深刻，下次肚餓自動自覺翻尋味。今日介紹的熟食檔，同樣是味力非凡，廚師把三十多年入廚功力，滲入每道菜式當中，而避風塘茄子更教街坊和流水客一吃難忘，於是愈食愈旺，成了同區大牌檔一哥。

記者：楊一凡　
攝影：伍慶泉

避風塘茄子$38 大廚推介
十指尖尖的茄子，炸得金黃通透，其實紫色外皮已削，怎麼又來一層黃金衣？茄子在切段後，先要沾層超薄的脆漿，然後才落油鍋；不披薄衣又如何？炸好後易收縮，瓜色變得暗啞，睇見都唔開胃。沾過薄脆漿的茄子，外脆內綿，加埋蒜茸和辣椒等避風塘配料兜兩兜，惹味出擊。

廖先生試味： 個矮瓜炸得好出色，條條色水均勻，又唔會燶或炒到黑咗，咬開又好軟熟，加埋炸蒜茸，勁啱送啤酒。

銀杏馬蹄炒鴿脯$58 記者推介
脯是指切得較一般肉片厚身的肉塊，較有𡁻頭，奇怪，薄才夠軟熟，厚有乜好？那是為了遷就對手，銀杏夠煙韌，馬蹄勁爽口，鴿肉比豬、牛、雞和羊都要嫩滑，片得太薄，入口如無物。鴿脯本身夠新鮮，不用多餘調味，已夠鮮甜。

余先生試味： 鍾意啲鴿肉夠滑，配料馬蹄和銀杏之外，還有西蘭花頭，好清甜，味道比芥蘭清。有肉有菜，清清哋幾適合夏天食。

畔塘煎藕餅$42
先把絞碎的瘦肉用鹽、胡椒、雞蛋、豆粉、芫荽和葱花等調味，然後加入切成粗粒的蓮藕，撈勻變成一糰，出力把這「瘦藕糰」打到起膠，然後揑成一小粒一小粒，把它們放入鍋裏，逐粒輕力壓扁，一反再反，煎熟底面。

俊揚試味： 藕餅煎得好香口又乾身，不油膩，咬開有好多蓮藕肉，還爽爽甜甜咁，送飯幾好吖。

巴辣豬紅(上)$18　麻辣肚絲(下)$32
在上湯裏加豆瓣醬、桂林辣椒醬和調味料，然後放入豬紅，煲滾，浸半小時才吃，最入味最滑，超時的話豬紅會變硬。每枱都會柯打巴辣豬紅，客人習慣了邊等小菜邊吃豬紅。冷盤麻辣肚絲是用滷水先煮熟豬肚，另一方面用豆瓣醬、麻辣香料和辣椒油撈個醬汁，拌豬肚絲，成香辣冷盤。

黃師傅試味： 豬紅滑如豆腐，醬汁浸着下面啲清湯蘿蔔，好好味；肚絲辣辣哋幾爽口，最啱配啤酒。

金銀蒜粉絲蒸金瓜$32
金瓜就是當時得令的南瓜，將金瓜切件，約半吋厚，走油後加些少調味和麻油，然後整齊排列在碟上，鋪層粉絲，跟手撒大量金銀蒜，即是熟和生的蒜茸，隔水蒸十分鐘，就食得。熟蒜茸經油炸，夠晒香口；生蒜茸辛辣未除，蒜味一等一，生熟蒜茸合一，既香且濃。

馬先生試味： 天氣轉熱，無乜胃口，呢個菜都幾開胃，南瓜清甜得嚟又腍腍哋，無咁油膩，算係咁。

店名：漢記小廚
電話：27960507
地址：九龍啟業邨啟樂街8號熟食亭
座位：約100個
營業時間：晚上5時至凌晨2時
付款方法：只收現金