好幾月前炒過一輪嘅駿雷國際（070），自從批過兩次股後就靜晒。不過，近排好幾個經紀朋友都話見過呢間公司嘅關連人士，話隻股就快再炒過，所以叫小初留意吓。
以前叫德智嘅駿雷，早排炒過上14至15仙水平，呢個月就由12仙回落到11仙樓下，但10仙水平就企得甚穩。
靚女經紀話，上兩次批股攞到貨嘅幸運兒，已經沽得七七八八，兼且在10仙水平收番齊貨咁滯，隻股噚日平收10.8仙，但成交量就好細。
靚女又話，今次搞手係同一班人，概念就繼續圍繞娛樂事業。至於呢個時候sell呢樣概念得唔得，靚女就話呢個唔係point，最緊要係幕後玩家有冇水。
另外，近排新股當旺，噚日泳衣大王德發（928）開個滿堂紅，今日又輪到嘉輝化工（582）上市，經紀陳話呢隻股十分低調，無聲無息就掛牌，從未見過佢哋出嚟吹水，但已超額認購，所以有必要留意。
慕容小初