一直被譽為響越野車界中，有勞斯萊斯風範嘅越野路華RangeRover車系，經歷32年嘅潮流蛻變，車廠終於決定響今年推出全新第4代新車。為咗隆重其事，廠方繼早前響意大利舉行首個試車發布會外，最近更安排亞洲區嘅傳媒，遠赴新西蘭Queenstown，一睹呢部全新RangeRover嘅風采同全天候駕駛能力。以其全面性及豪邁嘅鋪排，綜觀多款同級SUV，又有誰可以相提並論呢！
特約記者、攝影：張以中
鳴謝：部份圖片由越野路華車廠提供
自廠方向外披露咗新款RangeRover嘅造型後，外界反應可謂好壞參半；好嘅評價認為新車忠於原著，留有歷代RangeRover嘅神髓。而反方或許會係愛之深責之切嘅關係，認為呢一代RangeRover嘅賣相未有大突破呢！然而，筆者親睹呢部車之後，對其極富CyberFeel嘅頭尾燈配搭，及其輪拱兩旁留有透氣柵格嘅筆觸，留有深刻印象呢。
軸距及車身給擴闊後嘅車廂，倍見闊落舒適外，前後兩排剪裁貼身嘅高級真皮座椅，亦予人有充足嘅承托力；難得前後排重有中央手枕配搭之餘，後排椅背亦可因應需要收摺，令尾廂容量倍增呢！全新設計及鋪排嘅表板及中控台，極具高級轎車嘅豪邁一面外，亦見滲入有不少先進配搭；當中一分為二嘅中控台，佔據上方為原廠高級音響裝置，而下方則屬獨立前後恒溫冷氣，以及多個電子系統按鍵，就連新設嘅軚環，亦附有先進遙控音響及巡航等配備呢！除電窗、電鏡及電天窗外，重有前後房燈、外置12V電插座同六個安全氣袋裝置㖭！
而今趟試車之旅，着眼點會係配用全新4.4公升V8偈，以及一套Steptronic5前速半自動波嘅動力及傳動裝置；加上越野路華獨有嘅LowRange波箱齒比，以及一套HDC電子落山裝置，令呢部新一代RangeRover，馳騁表現動力源源不絕之餘，攀山涉水同樣如履平地。再者，RangeRover獨有嘅電子氣壓避震，演繹媲美現今平治S-Class同7系，加埋重有DSC、CBC、EBA、EDC同ABS等多套電子主動及被動安全系統，又難怪以一部標準車，可於On-road同Off-road都有出色嘅操控感啦。
多部全新RangeRover以標準裝備，穿越河谷攀越山丘，全沒有半點懼色。
起伏不一嘅泥滘，一般四驅車未必可以征服；而RangeRover有多套電子及四驅模式系統選擇之餘，四輪懸掛重有電子氣壓調校，自然可以輕鬆面對。
廠方安排有多個特殊地段，當中一個地面起伏不定之餘，若要攀越的話，除要有強橫馬力輸出外，亦好講求底盤嘅穩紮性，以及一套恒式四驅系統嘅可靠程度㗎。
今趟小記新西蘭之行，跟過往外地試車好唔同；皆因幾日行程全屬保密，大有今日唔知明日事嘅感覺，故每天均要大夥兒聽領隊訓話。而初首接觸呢部新一代RangeRover，更需要大清早便動身，及後還要經過近一小時嘅SpeedBoat航程，深入河谷之地，才可以一睹新車嘅風采，確實印象難忘；然而，最後一天駕駛RangeRover攀越雪山，響海拔千多呎嘅山腰上，倒真的好有一份自豪感。惟未及飽覽湖光山色之際，忽聞有多部直升機飛臨，才曉得今趟試車之旅，會以乘機折返而劃上休止符呢！
引擎：4398ccV8DOHC
馬力：282ps/5400rpm
扭力：44.9kgm/3600rpm
傳動：5前速Steptronic半自動波，恒式四驅
懸掛：（前）麥花臣支柱 （後）雙搖臂
制動：（前）透氣碟 （後）碟式（ABS）
輪胎：255/60R18
尺碼：4950×2191×1863mm
軸距：2880mm
車重：2440kg
0-100公里：9.2秒
極速：208km/h
平均耗油：16.2L/100km
新車售價：約港幣75萬起
查詢：越野路華香港（27132383）
優點：
新車富CyberFeel嘅造型，不失RangeRover豪邁一面；車廂鋪排既講究又豪華，難得以全原裝車竟可響新西蘭南島周邊嘅Queenstown河谷地，來回穿梭攀越高山呢！
缺點：
新車賣點忠於原著，未有太大突破；而時下流行多用途SUV設計，惟新車仍舊屬意兩排五座位設計而已。