鍾楚紅（紅姑）自嫁予朱家鼎為人婦後，一直鮮有出現公開社交場合，但最近她破天荒接拍了「美由奈」（MIYURA）健康食品廣告。紅姑昨日出席「美由奈」發布會時，風采依然。
闊別幕前十一年的鍾楚紅（紅姑），近年只出席一些環保活動。早前紅姑終於首肯為健康食品「美由奈」（MIYURA）以代言人身份拍廣告。而廣告的平面照及廣告牌將於本周六（下月四日）開始掛出，稍後紅姑將會再拍攝另一輯照片，但現身會晤傳媒則只有昨日的一次。
紅姑昨日以全身綠色打扮、配襯翡翠鑽石行頭往金鐘港麗酒店，出席「美由奈」發布會。她昨日甫出現，即受傳媒包圍。
紅姑鮮有露面，問她面對鏡頭會否不適應？她說：「唔會，面對鏡頭同記者呢份功能，已經根深柢固喺我嘅血液裏面，唔會唔適應。」
問紅姑復出接拍廣告，考慮了多久？是否先經丈夫朱家鼎的批准？紅姑笑說：「佢（朱家鼎）從來冇禁止我工作，係我自己奄尖啫。接呢個廣告之前我考慮咗一個月，亦試食咗一段時間。」
問紅姑拍完廣告後，會否心思思復出拍戲？她說：「呢個就冇可能啦，拍廣告只係用幾日時間，但拍片咁困身，我怕我適應唔到咁顛倒嘅生活。」早前紅姑的老拍檔周潤發曾說她是百分百的幸福女人，紅姑笑哈哈說：「係呀，所以我幾時都會感恩。」
紅姑多年來皆美豔如昔，究竟有甚麼容光煥發的秘訣？她說：「冇乜特別秘訣，做番自己就最自然。大家都知我好注重環保，太陽可以話係我嘅能量，一見太陽我就識笑，平時最鍾意曬太陽外，亦會游水同打羽毛球嘅。另外，我亦鍾意去旅行，目前最想係去非洲。」
採訪：顏英儀
攝影：陳慧安