人人話要北上創業，但不少人最後輸得一無所有。正如馮兩努號稱精通經營之道，亦不敢輕率，全力迎戰。在國內大搞企業家培訓期間，他努力背誦《毛澤東詩集》，看熟《鄧小平選集》，將自己變為國內一分子，與內地人打成一片。
五年努力的成果，無數國內企業精英成為他的門生，內地傳媒指他影響了全廣州三成財富，他自豪地說：「我單打獨鬥，冇契爺照，但都無輸畀任何人，我係創業嘅最好示範單位。」
記者：馮淑玲 部份攝影：伍慶泉
眼前的馮兩努穿着一件黑色唐裝衫，感覺有點像在電視主持節目，但這次講的並非古代皇帝治國之道，而是批評香港人北上創業心態。
「香港人太急功近利，又短視，跑腿心態，怕辛苦，入大陸只識搵市長，睇邊度有着數，希望博吓懵，炒番一鋪。但潮流唔興搵市長，搵官冇用㗎，要搵市場，要學默默耕耘，腳踏實地，好似台灣人咁，佢哋就係搵市場，開廠作長線投資，慢慢經營，過幾年就有錢賺。」
他還批評香港人，對中國文化認識不及新加坡人和台灣人，常常自以為是，容易受騙。「香港人最大缺點係唔知自己唔係英國人，去到英國，人哋當你係中國人；去到中國，又被當成番邦，結果豬八戒照鏡，裏外不是人。」
情勢看得如此通透，定有應對方法，馮兩努認真地說：「要識喺大陸生存，除摒棄炒家心態外，點都要讀中國近代史，念毛澤東嘅詩，學曉人哋嘅文化，否則唔能夠溝通。」
他就曾秘密練兵，每天早上花三十分鐘跑步，其間一邊背誦毛澤東詩詞、《鄧小平選集》，一年間每天反覆背誦，現能出口成詩，試過到南京紫金山參觀，即場與朋友念起毛主席的《人民解放軍佔領南京》，是毛主席慶祝鄧小平打勝仗而作。
「𠵱家大陸嘅企業家都係四、五十歲，大部份係飲毛澤東奶水大，天生就會念佢嘅詩，佢哋喺埋一齊，傾唔夠十五分鐘，就開始講毛澤東，講近代史，我第一次𢱑晒頭，我好缺新中國歷史，只識古代嘅，諗住用『舊史』拋人浪頭，但佢哋都好勁。經過嗰次，我就喺呢五年，苦讀新中國歷史。」
書包拋來拋去，馮兩努終於拋出點成績來，在廣州開辦了三十六期企業家培訓班，估計每次獲利十多萬元人民幣，培訓過千名廣東省企業精英，連上市公司美的、立白、科龍及華寶的管理層亦上過他的課，甚至有佔全國三成市場的電腦公司老闆接受電視台訪問時說，參加培訓班成為了他的人生轉捩點，使他走出困局，內地傳媒隨即指馮兩努影響了全廣州三成財富。
雖覺報道誇張，但馮兩努仍自豪地說：「我冇契爺照，單打獨鬥，一個人拎住個皮篋，嚟到內地搵商機，我唔會輸畀任何人，我係創業的最好示範單位。」
馮兩努可謂「冇人照」的典範。他出生於貧窮家庭，父親在中山家鄉看牛，獨力養活一家八口。馮兩努四歲時，父親不幸逝世，母親無法照顧六名孩子，便把他送到親戚家寄養。
「阿爸死咗，成個家好似分裂咁，我跟嫲嫲到香港，輪流喺姑姐、兩個伯父同姑媽屋企住，亦曾經寄宿，可以話我有六個家庭，到十四歲至再同阿媽一齊，所以我自細就好清楚，唔進步就被淘汰，犯錯就會滅亡，因為我唔似其他人有父母支持，出錯會有佢哋幫我解決問題。
「但咁唔代表我唔會去冒險，我會試新嘢，不過唔係李澤楷嗰種冒險，咁大膽，佢有老竇照，怕乜嘢。但我唔同，我唔敢犯一個大到承擔唔到嘅錯，我絕對唔會做這種冒險。」
自己冇父母撐腰，馮兩努樣樣事都靠自己，要賺錢交學費，就自己出來打工，抹窗、執垃圾、洗廁所、補習及髹漆，甚麼都做過，付出的努力較別人多，無錢讀書就自修，他所有的歷史知識全是自修得來。
「我細個時成日睇歷史書，《三國演義》、《西遊記》、《水滸傳》全部都睇過，因為學歷史唔使人教，自己睇就得。細個住板間房，一屋九戶人，咁嘈就走去樓梯底睇書，後來就去自修室，我每次都係最早去到嗰個，因為要霸位，但亦係最後走嗰個。」
就算大學畢業後，出來工作和出書，他都是全靠自己。「我以前喺大陸出書，無門路，自己去圖書館抄咗六十幾間大陸出版社，然後每間寄信去毛遂自薦，最後有兩間出版社搵我，咁至幫我打開大陸市場。」
雖然自己的成長過程如此辛苦，但他也不希望太過關照子女，反而想他們自立，學會承擔責任。「好細個我就訓練佢哋獨立，話明屋企冇遺產留畀佢哋，但會供佢哋念完大學。」
訓練包括思想獨立，不可樣樣依賴父母做決定；其次是財政獨立，他在兩名子女十多歲時，已給予每人一筆錢作為大學學費，讓他們自行學習去投資。
「多咗錢，佢哋壓力同責任感都大咗，好似我大女去英國讀三年大學，我一次過畀晒佢全部學費同生活費，等佢自己投資，畢業後佢已經識外幣轉換、定期存款同買賣股票，個人突然成熟咗。」
兒子則在十五歲時，馮兩努給予十萬元，讓他自己選擇買人壽保險、基金還是股票。「佢最後買咗股票，但2000年買入每股九十幾蚊，𠵱家蝕到六十幾蚊，我成日提醒佢蝕緊，等佢知要自己承擔後果。」馮兩努的「兩努」意謂，他做任何事都要兩倍努力，始終世上無免費的午餐。
1.摒棄炒家心態
不要短視，學會長線投資，務實及謙虛學習，才會獲得回報。
2.讀中國近代史
與國內人士有共同話題，能了解中國文化、人情世故，懂得與內地人溝通和相通。
3.尊重內地人
馮兩努認為，香港人最大的錯誤是小看內地人，這是災難來的，既然要賺人民幣，就要放下高傲態度，令他們FeelImportant（覺得重要），當他們受重視，使錢亦覺開心。
1953年 生於廣東中山縣翠亨村
1957年 喪父
1976年 加拿大約克大學歷史系學士學位
1978年 結婚，現育有一子一女
1995年 主持亞視《三國啟示錄》
1996年 主持亞視《三國演義超智版》
1997年 主持亞視《中國財神秘笈》，聯同24位隊友行路上北京籌款
1998-99年 亞視互動新聞網嘉賓主持
1999年 主持亞視《馮兩努論雍正及亞洲電視互聯網資訊背後的智慧》
同年12月成功當選灣仔司徒拔道區區議員
獲獎：
《向失敗挑戰》榮獲90年10大好書之一
《隋唐歷史教訓》榮獲96年10大心愛好書之一
《三國演義超智版》榮獲96年欣賞指數最高節目之一