港股期指結算日，遇上美股上周五大跌，杜指萬點大關失守，都算好友唔夠運，期指結算後，港股走勢可能要跟美股向下調整。現時資金由美股流向債市，部份因為息口低索性流出美元市場，短期港股相信會幾難睇好。紅籌及國企股亦因內地長假在即而回軟，不過東北電（042）債務重組就快搞掂，重組概念可吼。
市場傳出證監會查三四線莊家股活動，但據阿虎所聽，只係循例工作，每逢三四線股有異動，聯交所與證監都會查問證券行有咩人喺度買賣，證監會比較關心係證券行有冇遵守孖展守則，費事證券行出問題，又令證監遭人狠批。既然證監會出到手，三四線股點都要做吓樣回軟，其中只有金禾國際（090）跌得比較急，股價跌逾10%。
深圳國際（152）公布業績同時宣布長和系喺市場吸納逾7%股權，立即刺激股價勁升16%。其實長和系購入之股權不足10%，根本毋須向外公布持股情況，似乎係有人想借長和個名推高股價。長和系增持行動曝光，黑客估計可能好快就會有行動。
HKCYBER.COM（8118）噚日勁升36%，收1.5仙。Cookie話此股又傳放盤賣殼，股本重組之後可能會大量發新股畀新投資者。ｉ師傅話，其實要喺創業板上市話都冇咁易，何需買殼？買賣殼嘅消息大部份醉翁之意在於炒作。
阿 虎