英皇力捧新人周英杰繼月初被誤以為自殺，遭警方破門入屋後，昨日周英杰與容祖兒到海洋公園玩遊戲時，周英杰自爆前日凌晨其跑馬地蟠龍苑寓所遭連環爆竊，損失兩萬多元財物。
昨日周英杰和容祖兒（Joey）到海洋公園試玩全新超動感數碼歷險旅程「威威至激之旅」，並邀請七十名fans與偶像同樂。
周英杰自言甚愛玩刺激遊戲，但最近卻發生了一件激氣事，他說：「我噚日（二十八日）凌晨屋企俾人爆格，重要係成幢樓四層一齊連環爆。當晚我同英皇工作人員唱卡拉OK，到凌晨三點幾先返屋企，點知開唔到門，原來有賊入屋偷嘢，佢重用萬能膠黏住道門，費事偷偷吓嘢我返嚟。我報咗警，損失大概兩萬幾蚊財物。」
周英杰續說：「我覺得個賊好不幸，因為我屋企家徒四壁，都無乜值錢嘢偷，佢偷咗一部ＮＥＣ手提電腦，一部愛華MD機同兩副太陽眼鏡。我真係唔知佢偷眼鏡做乜，唔通佢又有六百幾度近視同散光？可能佢唔忿氣無嘢偷，所以開咗罐汽水飲，重放番喺枱上面，不過我冇諗住追究，因為差人話要喺屋企掃指模兩個鐘頭，但我跟住有嘢做，咪唔追究囉。」
而周英杰現時所住的蟠龍苑，陳奕迅和徐濠縈亦曾在此居住，去年才搬走，周英杰簽約英皇後即搬入現址。不過周英杰坦言不會因此事而另覓居所，但會買壘球棒作防範。
而Joey昨日談到陳奕迅講錯說話得罪周星馳時，Joey說：「攞膠紙封住佢個頭啦。」
採訪：朱芷瑩、駱華齡
攝影：何國豪