墨魚周身都幾乎食得，繼有墨魚嘴、墨魚汁都食得之外，最新嘅有呢款分開只有墨魚翼位部份嘅出售。我肥媽平時就至怕劏墨魚而搞到周身腥味，但又鍾意食墨魚嗰種爽口感，幸好畀我搵到呢款嚟自大陸嘅墨魚翼，劏好晒，乾淨又衞生，最重要係口感同墨魚肉差唔多，只係肉質稍為薄啲，但勝在細細件易入口，完全合晒我心意，炒或打邊爐都可以。
$3.8/100克
吉之島有售
春回大地，濕氣重，對人未必係好事，但對某種食物則有利，佢就係菌類，天氣愈潮濕愈有利佢哋生長，所以春天係食菌嘅好時機，今日我要講嘅係草菇，佢係其中一種較抵食嘅菌類，由人工培植，價格都幾穩定，無論菜檔或超市都容易搵到佢。無論炒、煮、燜或滾皆可以，草菇含十多種氨基酸，有消滯及增進食慾功效，老人家食多啲更有助降膽固醇。
$8-$8.5/半磅
各大菜檔有售
嚟自日本嘅摺合式多用途架，為主婦們帶來唔少方便。個架可以勾喺鋅盆內，配上附送嘅不織布通窿袋，可以喺一邊洗餸菜或洗碗時，將啲唔要而又濕𣲷𣲷嘅垃圾即時棄置袋內兼隔走水，而個架背後更附有一個吸盤，以加強袋嘅負荷量，可承受重1kg嘅重量。除咗附送嘅有窿袋之外，個架同時亦可用圓形或背心形普通膠袋作替換，以放未處理嘅乾貨，用途好廣㗎！
$38/個(內附5個小袋)
銷售點：太古城city'superLOG-ON
文：肥師奶