拓荒者今年又俾湖人喺季後賽首圈直落三場掃出局，呢隊波今季嘅軍費成六億五千萬港幣，班球員個個腰纏萬貫，但係幾乎個個都好食懶飛，毫無紀律同鬥心；以咁嘅料同雄心勃勃嘅湖人對撼，唔輸波就奇！
喺拓荒者眾多廢柴中，我求大俠最激心嘅就係桑甘保。呢條「肥仔」前鋒今季嘅人工同佢嘅重量一樣咁嚇死人（近一億港幣），但係佢嘅表現就渣到痹，成季平均只係攞得嗰可憐嘅六分；喺季後賽重跌到只得三分半，喺NBA求其搵個二打六嘅超級大後備隨時打得重好過佢，簡直係NBA嘅掠水王。
如果我係班主，肯定第一個踢走佢，跟住再炒埋表現卻同薪酬成反比嘅柏賓同史杜達米亞，咁樣拓荒者先有望翻身。
呢排不時有讀者話蘋果體育嘅賭波表資料有問題，我求大俠喺度先多謝讀者關心；不過，賭波表嘅資料查實一直冇問題，而係最詳盡就真。好似我哋會計晒球隊今屆所有比賽戰績同埋數據，等資料參考性更強，但有讀者誤會咗呢啲係聯賽資料，所以覺得資料有出入。無論如何，我哋都好多謝同埋需要讀者嘅鞭策，我哋一定會繼續精益求精！
前晚知道西甲聯貝迪斯贏咗馬略卡後，我求大俠心情真係好矛盾，首先，蘋果體育點題嘅全日心水貝迪斯中咗，我固然高興；不過另一方面，對於星光熠熠嘅馬略卡好大機會要降班，就有啲心噏。都係嗰句，如果馬略卡今屆唔係要分心打歐冠盃，佢哋未必會搞成咁。
木狼連續第六年喺季後賽首圈出局後，我求大俠即收到風話木狼嘅「翻版賓艾費力」薩比亞將成為球隊輸波嘅替死鬼。因為龍頭大哥加尼特係鎮山之寶唔郁得，所以惟有攞打得又睇得嘅老二薩比亞嚟開刀，呢個世界真係好現實。
唔知係因為巴治奧復出後有表現，還是輿論壓力，意大利教頭查柏東尼日前突然改口風，話會考慮重召巴治奧踢世界盃。我求大俠站在球迷角度，當然希望響決賽周見到呢位昔日金童。講到尾，能夠憑一人扭轉球賽嘅球星買少見少。