博鰲論壇已經結束，兩千幾名代表連家眷早已離開海南島返咗屋企。前排有報章報道話博鰲論壇搞到一鑊泡，參加者怨聲載道。呢日食飯時刻撞到賓架L，賓架L自己同埋唔少老友記，攜眷參加，所以有親身經驗，問佢情況如何，點解咁多人去，賓架L話：「中央第一次搞，以後每年搞一次，所以非常重視。阿松收到風，於是周圍打電話搵人去捧場，講明特首親自去，有機會見到朱鎔基。大家咪畀晒面，諗住海南島風景好，開完會可以享受吓。點知當地辦事組織全無經驗，博鰲酒店滿到瀉，佢哋唔係問人有冇訂房，而係先到先得，咁就煩死人，成個澳門代表團幾十人都冇房住，最後只畀房何厚鏵，其他人要住響海口，每早起身坐巴士個半小時到博鰲開會。好嘞，因人太多，自助餐唔夠食；開會準備不足，啲無線咪部份失靈，都唔知聽到乜；識講英文嘅職員少，外籍人士有苦無路訴。總之一塌糊塗，朱總理覺得好唔好意思，要講鎖你。好多人都話怕怕咯，出年唔會再嚟，但總理見我哋嗰陣，就好客氣咁講：港澳人士明年繼續參加！」
咁賓架L明年去唔去呀？賓架L大笑：「阿松今年好落力打電話，睇怕明年佢要打得更多！」
明年照計唔怕去，中國人愛面子，今年失威，明年一定抽調北京上海廣州精英去博鰲幫手。至於今年啲搞手，睇怕都要按照國情，多多檢討咯！