有「光頭仔」之稱嘅樂壇新人王嘉明，最近為本地出產嘅一隻新牌子手表ＯDM任代言人，拍咗一輯硬照廣告，廣告會喺下個月陸續喺內地、香港、日本同美國等地推出。
王嘉明除咗以一身便裝嘅書生look拍攝廣告外，廣告商重要求佢赤裸上身「晒表」。所以王嘉明拍廣告前兩日，臨急臨忙狂做掌上壓同舉啞鈴。
只可惜拍完呢輯肌肉相之後，廣告商要留番第二輪宣傳先至出街，所以暫時大家就無緣見到嗰張相。
拍攝當日王嘉明話：「今次我同廣告商簽咗兩年約，酬勞有六位數字，新人算ＯK啦，佢哋重送咗二十隻表畀我，有排戴呀。」
王傑日前喺馬來西亞雲頂開演唱會，雖然佢因病聲沙，但捧場嘅歌迷依然好支持佢。王傑呢次演唱會純粹以歌會友，唔玩花巧，重請咗一位女歌迷合唱《還有》一曲。之後佢又請咗另一位男觀眾上台同個女仔一齊，王傑重講笑咁話自己撮合咗一段好姻緣。
肥媽做咗切除大腸腫瘤手術唔夠一個月，噚日就已經返有線開工，一班好朋友包括袁詠儀同蔡一傑專登上佢嘅節目《娛樂熱賣大唱大跳》同佢慶祝。肥媽同記者講話做人最緊要保持開朗，重叫我哋記得捧場睇佢個仔同新抱，幫港台拍嘅節目《希雲在線》喎。
譚炳文噚日喺個女陪同下到葛量洪醫院覆診，炳哥重展示個傷口畀記者睇。炳哥話𠵱家沖涼要坐喺櫈仔，用毛巾遮住個傷口先可以沖涼。炳哥話暫時冇退休打算，不過會選擇性接工作。雖然炳哥休養緊，佢對阿姐汪明荃患乳癌嘅消息亦好關注，重主動問記者阿姐嘅情況點㖭。
方力申噚日去咗尖沙嘴洲際酒店，以代言人身份，出席護膚品Biotherm喺酒店泳池旁邊舉行嘅宣傳活動。佢特別着件白色開胸恤衫，喺池邊玩水露出胸前其中一點。另外，咁啱同場泳池旁邊有一位女士，解開泳衣上截趴喺度曬太陽。