個個驚住個市俾美股拖累，結果個市冇乜點散到。5月期指重有得升㖭，表面上高水4點，實際上計埋啲大藍籌下月除息因素，高水多好多。
壞消息（美股、美滙齊跌）下，港股跌唔落，就要諗番啲藍籌Call輪玩吓。股市一個個浪咁玩，每個浪都有龍頭股帶領。上幾日，中移動（941）領軍；下一鋪，以「系」嚟睇，估計係長和系帶動，值得諗吓買啲李系Call輪。
長實（001）最低71.75元，收72.75元，只跌一格，已經連跌3日，係時候反彈，亦係時候揀隻Call輪埋手，對象係9063。9063最低44.5仙，彈上49仙埋單，彈力好勁，仍跌2仙。上禮拜最高63仙，有唔小水位。
和黃（013）叻過長實少少，低見67.50元後踢番上去，收67.50元，平前市水平。和黃Call輪9110收42仙，跌2仙；和黃輪，吼呢件。
早段個市軟軟哋，滙豐（005）屬於逆市硬淨嗰類，平收92元。
穩穩陣陣炒滙豐Call輪，離唔開9030，以輪論輪，計數揀輪，隻輪好抵。現價1.01元，今年8月到期，溢價得1.6%，槓桿率9.1倍。
章 盛