通販文，全港第一個網上搞裏原宿嘅港人，幾年前已成立網站同愛好者交流，後尾搞埋網上買賣，舖租都慳番，靠地鐵站面對面交收。起初以為手作仔生意，點知愈做愈大，食正網上付款服務PayPal興起，FedEx又非常方便，吸引埋外國客幫襯，勉強都算環球性生意，後生仔來講算醒目。
最近通販文終於搞埋舖頭，店址選喺山林道運通地下，月租巿價五千零蚊好易捱，加上手頭有班網站擁躉客，相信唔使頭痕。不過佢並冇掉以輕心，落足心機，淨係間舖都裝修近月，唔似其他水貨老闆仔算到盡，爭取免租期內開舖。
話時話近日運通地下又有連續幾間舖丟空，向街門口位約萬五蚊租，拍得住旺角兆萬，合唔合理見仁見智。不過山林道旺遊客同午飯小白領，早排開間摩登夜冷便食到正，最近連廣告女郎YoYo加入開民族舖，反應要等吓至知。袁人祥話山林道做食店最穩賺。
主持人：大食Jack
八卦熱報：