雖然預咗期指結算日好友會力頂，港股唔會大跌，但期指大局已定後，尾市突然急彈，令恒指跌幅收窄至23點，則反映市底較想像中強，5月期指收11365，輕微高水4點，形勢對好友較有利。
趙飛雲又陷入進退兩難局面，噚日早市嫌港股跌得唔夠深，諗住午市期指結算大局已定後，好友可能會功成身退，恒指跌幅會擴大，點知情況啱啱相反，令趙飛雲大失預算。雖然形勢上今日恒指向上機會大過向下，但總覺得暫時無特別利好因素，支持恒指一舉升破250日線11517阻力，所以暫時都係按兵不動，等佢回頭才吸納恒指Call輪9045。
不過，如果恒指呢幾日守於雙底頸線11400之上，亦要先買入第1注9045，待升破250日線企穩後加注，如升唔破回頭則沽貨獲利。另一方面，如果恒指先作調整，下試11100至11000水平，則可較大注出擊，因值博率較高。
佑威（627）噚日突然發威急升，收0.72元，成交亦明顯增加，睇嚟今次有機升破0.76元近期高位，不過上周既然已沽貨離場，只能歎一句無緣，亦無謂再追。
趙飛雲