昨日政府總部門口，有一個包紮到密密實實嘅木箱送來畀阿董，送禮者係中遠集團總裁魏家福，收禮者就係特首董建華。八方見個箱嘅大細同形狀，跟長毛示威必備嘅紙棺材相近，到底裏面裝住乜嘢呢？
中遠魏總裁當然唔會送棺材畀阿董。八方記得上個星期五阿董出席中遠COSCOHONGKONG貨櫃船首航時，做主禮嘉賓，魏總當然禮尚往來。
知情人士話畀八方知，中遠凡有新船首航禮，都鍾意按足實物比例做番批模型船嚟送畀嘉賓。睇噚日送畀阿董的木箱大小，如果冇估錯，應該就係呢隻COSCOHONGKONG嘅模型船。可能當日阿董走得太匆忙，又或者唔方便捧住隻船周街走，所以中遠直接送去特首辦。
其實，首航當日重有啲漏網花絮，話說當阿董上船參觀時，風浪都唔細，其他嘉賓少不免要捉實扶手，惟獨係阿董扶都唔使扶，鬼咁輕盈就上咗船，真不愧係船王之後，經慣風浪。不過，唔知未來五年香港會唔會好似身在船中咁「啷吓啷吓」！
E-mail：