超高豪宅紅磡海名軒，在短時間內賣出唔少單位，成績理想，一名印尼華僑最近斥2003萬元，購入1座高層2172方呎單位，市傳佢係林紹良或其家族成員，但實情係一場誤會。買家只係同林紹良相識，但佢為免俾人非議，所以要加以澄清。
呢個買家原來經營貨運業務，總部設於新加坡，今年初來港設立支部，租咗一個7000幾呎貨倉；買海名軒之後，第二日又再用207萬元，買咗葵涌月海灣2座一個約600方呎單位，做員工宿舍。
只要肯努力，始終會有回報，曾響細行做代理嘅蔡健雄，加入中原青衣分行3個月，為公司累積做到70萬佣金，而3月份嘅數重係最勁，有成40萬。佢上司周永輝話，早前盈翠半島送票上東莞嘅代理就係佢，而佢響長沙灣昇悅居代客入咗11張票，𠵱家更成為青衣區嘅TopSales。
置地同北京萬通合作嘅北京住宅樓盤「新城·國際」，今個禮拜四在港舉行展銷會開幕禮，出席者有置地集團行總裁蘇兆明、執行董事黃友忠、北京萬通董事總經理許立同北京萬置張九紅，來頭認真唔簡單。
蘭西