一般楊桃要八、九月至當造，不過今年就早上市，現已可以喺各大果檔搵到。過酸嘅楊桃我肥媽就至怕，試過呢批楊桃係甜嘅至敢介紹畀大家。楊桃來源地有台灣、新加坡等地，最近上市嘅係嚟自新加坡，食味會較甜，但相對價錢亦略貴少少，平均每個要四、五蚊。楊桃至啱糖尿病患者食，始終因為佢糖份低，唔會過甜，而且食滯咗食楊桃，助消化一流，我肥媽無介紹錯㗎！
回南天，好易有疲倦或無胃口迹象，此乃正常反應，因為潮濕天氣之故。呢個時候我肥媽就會以祛濕湯水佐膳，最簡單可以用冬瓜配合赤小豆、瘦肉、果皮一齊煲，一家人同時飲，既可以祛濕，又有清熱下火功效。另外以冬瓜配薏米煲成糖水畀小朋友飲，更有消積滯療效。冬瓜當造，價廉物美，燜煮同樣一流㗎！