患病不可怕，最可怕的是連生存意志都沒有。二十多年前因患上精神分裂症而曾經多次自殺的周尚善，試過以吸煤氣、插電掣、甚至跳天橋等方式求死，希望解決幻聽所帶來的痛苦。不過因別人一句「大食懶」，她誓要發奮重新做人，戰勝病魔，還贏得不少比賽的獎項。今天的她一切得來不易，回顧從前自殺的日子，她頻說：「以前我輸唔起，𠵱家我輸得起。」
記者：曾順珍 攝影：陳智良（部份相片由被訪者提供）
相約周尚善在她媽媽麥當奴道的家中做訪問，一見面她立即說不少政界名人都是這裏的街坊，但令人感興趣的反而是她要保密的年齡，因為她生有一張娃娃臉，在兩鬢白髮襯托下，令她年輕得來又帶點滄桑。
她拿以前年輕時的照片出來看：「呢，呢個咪出世無耐嘅囡囡囉，我嗰時重做緊股票經紀，後來囡囡出咗世，個工人又辭咗職，我先至要留喺屋企做全職家庭主婦，可能唔甘心，無幾耐就開始有精神分裂症。」周尚善說話時不停用手把弄着她自己設計的保暖壺。
周尚善回憶着，說自己由77年開始患有精神分裂，也許不甘心做家庭主婦，也許患有產後抑鬱，她開始產生幻聽。
「我本來係股票經紀持牌人，突然要我由一個好高嘅職位，走返入廚房做家庭主婦，我好唔習慣，覺得自己好無用，所以慢慢開始聽到有人鬧我，聲音由窗外傳入嚟。鬧乜？總之乜都鬧，連我心入面諗乜佢哋（指聲音）都知，又話我無用又話我好衰，搞到我連父母、丈夫都唔信任，完全無安全感。」
周尚善說當時她覺得所有人都想害她，「我甚至可以連電視新聞同報紙上刊登嘅日子都唔相信，你話做人幾辛苦，如果你未經歷過呢種情況，根本唔可能體會到嗰種心情。」
就因為做人太辛苦，周尚善當時覺得只有死才可解決問題。「77年我開始產生幻聽，直至80年我先逐漸康復，由於期間幻聽嘅感覺強勁，簡直係24小時疲勞轟炸，所以喺呢段期間我總共自殺咗7次。」
周尚善試過開煤氣、服食山埃、用被冚頭、飲通渠水、割脈等方式了結生命，但都被家人發現救回，又或因通渠水太難飲而放棄。
「我覺得最搞笑係有一次我用兩支螺絲批插入電掣，以為咁樣就可以電死自己，點知現今科學太昌明，電掣居然跳Fuse，所以我又死唔去。最後一次自殺係跳天橋，地點係喺前港督府附近，條天橋大約有30米高，我一跳就跌咗落行人路上，當時我重清醒，但又覺得好痛，尤其是啲人搬我上救護車時最痛。」
也許命不該絕，但七次自殺換來的是兩條大髀骨折斷、盆骨移位和造成手腕永久性痛楚。周尚善話她每次尋死，都非常決絕，也未曾流過一滴眼淚。
「我要在這裏聲明，我要為多年前見到我跳天橋嘅人道歉，因為我令到佢哋好不安。」
這一次跳天橋令周尚善可重新做人，因為她被送到瑪麗醫院的三個月期間，曾轉送到精神科接受治療，在每天都乖乖食藥的情況下，纏擾數年的幻聽逐漸消失。
「我好得咁快係因為我每日都好肯食藥，因為當時我覺得每個人都想害我，我怕如果唔肯食藥，醫生同護士會打我，所以我先至咁乖食藥，但點知就咁反而令我嘅病康復得好快。」
幻聽的後遺症是整個人無晒精力，周尚善出院後每天都卧在床上，除非必要，否則大部份時間都會與床為伴，這樣維持了差不多五年。
「有一晚我發噩夢，夢見丈夫趕我走，再加上聽見有人話我係一條大懶蟲，大食懶。為咗唔想俾人睇死，我去報讀一啲實用嘅課程，於是我去附近社區中心報讀整麵包嘅Course，又去跳健康舞、學家居維修、裁剪編織、木工、修理電器、中西小菜、英文、美容美髮等，令生活變得充實有意義。」
回復正常生活並不能令周尚善就此滿足，她要向自己的能力挑戰，加上她父親在93年去世、丈夫對她的環保意識頗有異議，於是她要把悲憤化成力量，開始嘗試參加各項比賽，藉以試探自己的能力。舉凡烹飪比賽、徵文比賽、廢物利用比賽、攝影比賽等，她都一一報名參加，還獲得好成績。而令她最鼓舞的是在97年獲得「香港十大再生勇士」及「2000年傑出殘疾人士獎」。現在她是堅道明愛社區中心互助社和浸會愛群社會服務處屬下健群社的會員，經常到安老院或社區做義工和探訪工作，閒時她又愛炮製蛋糕點心，可說是找到自己真正的樂趣。
「如果我無呢個病，就唔會有咁多姿多采嘅生活，可能我重係做緊我唔鍾意做嘅工作（指股票經紀）。呢個病令我知道凡事都唔可以睇得咁負面，而且亦醒覺到自己其實好幸福，因為我嘅屋企人、丈夫同個女都無離棄我，所以我活得好開心。」
問周尚善她的家人如何支持她？她沒有正面回答，她只淡然地說：「我好多謝我嘅丈夫，因為當時他為防止我吞藥自殺，每日都會親自從寫字樓攞藥畀我，又唔離棄我，總之我覺得佢好偉大。而個女都好支持我，𠵱家佢喺紐約讀緊碩士……我唔想再講我嘅家人喇。」
對於現時香港有不少人一遇挫折便要跳樓、燒炭自殺，她半講笑半認真地說：
「自殺當然唔好，因為佢身邊嘅人會好傷心；鄰居都會打個突㗎嘛，因為見慣見熟嘅人突然無咗；見到你自殺嗰啲人亦會俾你嚇親；重有如果係租屋住嘅，間屋死過人都好難再租出去啦，咁會累死個業主，所以係好唔負責任嘅行為。
「如果唔開心嘅就最好搵精神科外展隊去尋求幫助，我相信每樣事情都有解決方法，要樂觀啲，如果可以靠自己努力解決嘅話會係好開心嘅事。」
堅道明愛青少年及社區服務社工黎姑娘認識周尚善已七年，她覺得周活躍好動，而且勇於嘗試。
「好似佢參加烹飪比賽咁，初時佢嘅屋企人唔係咁支持，話佢會輸，不過佢仍然報名參加，結果重攞咗獎㖭。我覺得佢係一個好有創意嘅人，可以無限量發揮，尤其是一啲大家覺得無用嘅嘢，佢可以化腐朽為神奇。所以六月我哋將會同佢一齊搞個《環保精神由家居開始》課程，而佢會係呢個課程嘅導師。」