《蘋果》財經版「人物素描」喺星期五講廖創興銀行主席廖烈文，辭去董事總經理（CEO）一職，由細佬廖烈智繼任。廖烈文講起廖創興銀行嘅六一年擠提，佢臨危受命之舊事，眼泛淚光，聲調十分感人。
港交所、金管局都希望上市公司?銀行嘅董事會主席與行政總裁兩個職位分開兩個人做，加上廖烈文已經年過七十，於是順水推舟，交個行政總裁位俾細佬接棒，佢位二公子廖鐵城（Donald）就做到行政總裁。當奴廖乃係銀行界高層人士之中罕有嘅品種，佢周不時喺中大第二書店或者商務印書館嘅讀書會出現，左丁山就聽過當奴主講中國清代放洋留學生（由第一位講起﹚在中國現代化過程嘅角色。佢平時最鍾意讀書，雖然留學英國，但對牟宗三唐君毅等著作，十分熟悉。
廖烈智為人精明作風穩健，由佢接棒，十分有道理。只可惜佢位太座前些時去新加坡旅遊玩樂，不幸因意外逝世，聞者哀之。智哥（銀行界對佢嘅稱呼）哀痛異常，即刻包一架專機運送愛妻遺體返港，聽講喺今個星期舉行追思禮拜。老友！做人係唔係好兒戲呢？所以我哋辦事認真之餘，做人真係要睇開啲，無謂同上天對着幹，譬如左丁山知道今世唔會發達，如果重係「偏不信邪」，棧晚晚瞓唔着㖭。