劉嘉玲與梁朝偉相戀多年，兩人的感情已昇華到很高境界，高得足以讓她批准男友跟其他女性來往，只要偉仔覺得悶，她便會批准。嘉玲亦不再渴求跟偉仔結婚，因一紙婚書不算甚麼。 記者魯萍、何國豪深圳直擊
劉嘉玲和梁朝偉（偉仔）相戀十二年，二人的感情生活可謂各自各精采，最近偉仔被傳與嘉禾旗下女星安雅過從甚密，有說他倆來往，事前是得到劉嘉玲批准。
昨日劉嘉玲與呂良偉在深圳為嘉匯百貨公司開幕剪綵時被追問此事，她說：「我都係睇報紙先知安雅個樣係點嘅，偉仔咁靚仔，當然係大把女人鍾意佢啦！我唔知佢拍拖嘅傳聞，不過只要佢悶，佢同個個拍拖我都會批准，我唔會擔心呢啲嘢，我唔會鍾意一個男仔係冇女人鍾意嘅。」
嘉玲為何不向偉仔追問緋聞？她說：「我對自己有信心，呢個世界係你嘅就係你嘅，緣分盡都冇可能喺埋一齊，命運好多時係咁，好多係整定。以前我都會諗吓結婚，𠵱家反而唔想諗呢啲，結婚唔代表一切，結咗一樣可以離，所以兩個人開心已足夠，唔一定要結婚，除非有BB啦！生仔呢個包袱要揹到死為止，責任咁大，我自問冇勇氣接受呢個挑戰。」
對於前緋聞男友Sherman跟車婉婉相戀，嘉玲高興地說：「係咩？恭喜佢哋！我唔知佢哋拍拖，又唔係好熟。」
而嘉玲昨日為深圳嘉匯百貨公司剪綵，乃是由呂良偉太太楊小娟安排，當時吸引了數百名市民圍觀，場面十分混亂。嘉玲稍後會為該百貨公司拍廣告，並擔任代言人。
此外，安雅前晚在會展出席《蜘蛛俠》首映，她身穿低胸背心，十分性感，她說：「早排我拍咗張玉珊嘅修身堂廣告，呢啲衫都係佢哋安排畀我着，稍後我會幫嘉禾拍一部片，至於會唔會露點，就要視乎導演同劇本先可以決定。」