上周五美國公布第1季GDP增長5.8%，較市場預期強勁，但美股稍為彈一彈，跟住就大散。有人話嗰啲係滯後數據，新公布嘅消費信心指數弱，第2季GDP可能會表現差，亦有人話美元近日轉弱，資金有迹象流出美國市場，美股難免受影響。
大戶要炒落，演繹消息方法當然會唔同，由技術走勢圖睇，杜指及納指走勢確肉酸，雖然已有超賣訊號出現，但好可能會再插深啲。另一方面，過去大半年嘅體驗，美股走勢十分波動，好多時唔單止經濟因素影響咁簡單，因此唔排除美股可能兩三日內又升到你唔信，完全扭轉劣勢。
綜合而言，現時美國經濟情況及息口走勢，其實對香港有利，有適量嘅資金流出美股及美債，令美元弱些少，長遠而言對香港經濟及股市好處多過壞處。
呢個禮拜主要睇吓重有冇資金繼續流入，如果資金持續流入，港股應該未升完。
趙飛雲上周五清晒貨，呢個禮拜有機會買平貨，恒指第一個支持位約11200水平，第2個支持位萬一關，而50日線目前喺10942，即係話11000水平守得穩嘅機會相當大，可以伺機吸納恒指Call輪9045博反彈，跌穿1萬點就先計數止蝕。
趙飛雲