顧紀筠（顧老闆）年初喺銅鑼灣開設鞋店Liliana，最近佢忙緊鞋店嘅生意外，有寫開書嘅佢，重要為嚟緊嘅書展準備。身為鞋店副總裁梗係要親力親為，所以顧老闆喺早前去咗米蘭，去嗰邊數一數二嘅Micam鞋展，參考吓人哋嗰邊嘅經營模式同最新嘅鞋款。
今次米蘭之行可謂獲益良多，顧老闆噚日接受電話訪問時話：「今次好開心，除咗可以對呢個行業有更多了解外，最開心嘅就係可以見到自己心愛嘅靚鞋。每一對我都試過，重親自入貨㖭！」
講番鞋店生意，顧老闆話四間分店今日分別喺中環同尖沙嘴等地區舉行開張儀式，佢已經請咗老友楊崢同吳美珩等做嘉賓，以馬拉松方式剪綵，實行喺逆市闖出一條血路！
謝霆鋒俾廉署調查呢單嘢，竟然搞到城中名媛趙金卿好鬼煩。事關趙金卿有個老友，係霆鋒嘅鄰居，都係住喺舊山頂道裕景花園，平時趙金卿一個星期總有幾日去探吓呢個老友，但𠵱家成班記者日日喺霆鋒樓下度等，趙金卿同人講話怕咗啲記者，惟有暫時唔去探老友。
馮仁昭日前喺尖沙嘴美麗華商場附近，見到有市民圍觀，咪走去八吓有乜睇，原來係無綫姐仔張可頤、滕麗名同埋湯盈盈喺度拍嘢，佢打扮成OL咁，劇情講佢櫥窗度。
梁詠琪前日為一個模特兒大賽擔任評判，咪着咗件二千幾蚊嘅橙白間條MarcJacobs外套出現，真係有咁啱得咁蹺，傅明憲早排出席曾志偉生日會時，亦都曾經着住同款衫示人。其實呢個圈周不時都有人撞衫，不過今次重蹺，因為佢兩個嘅英文名又係叫GiGi。若果佢哋着埋嗰件衫喺同一場合出現，你都咪話唔尷尬。
拍賣行佳士得噚日喺金鐘萬豪酒店舉行預展，見周嘉玲同父母經過，佢即刻話純粹係陪父母歎茶，冇錢嚟競投喎。
周嘉玲之前講過新工作詳情未公布得住，噚日再問佢，佢重話要繼續保持神秘，重要賣關子。
張艾嘉日前接受台灣記者訪問，話自己近排好鍾意聽周杰倫嘅歌，重買咗周杰倫隻碟畀個仔聽。佢重大讚羅大佑嘅歌，話羅大佑嘅新作品一啲都唔過時，而李宗盛嘅歌就依然令佢好感動喎。
任賢齊同MaggieQ早排喺台灣拍咗個點睛品珠寶廣告，而拍攝嘅場景就只係一張床。小齊話：「廣告內容講我哋結咗婚，梗係一定要上床㗎啦！」而MaggieQ拍攝時，着咗件緊身小背心，美好身段表露無遺，非常性感。
郭秀雲噚日出席慈善團體「幼聯」舉行嘅「活力齊起步慈善步行2002」，喺大潭郊野徑舉行起步禮。
郭秀雲早前表示過𠵱家埋首創作，準備舉行畫展，佢話：「我成日睇啲童話故事，希望用嚟做題材，最煩嘅係，喺我好忙嘅時候就成日靈感到，我每次正經坐低作畫，個腦就空白一片。」