地產多聲道:高球手誘人北上

地產多聲道:高球手誘人北上

深圳多個新樓盤在上周末都賣得好好,其中包括以觀瀾湖高爾夫球場做賣點嘅賽維納,當日更加有國際知名球手恩尼艾斯在場打波,吸引唔少高球界名人北上,好似出晒名熱愛打高球嘅譚詠麟同一班影視界好友咁。但係發展商就唔肯透露佢哋有冇落定買樓。

皇崗過境塞餐死
深港兩地新盤供應同樣咁多,喺注意樓盤銷情之餘,過關交通問題亦係重要課題,好似蘭西近排多次北上,羅湖海關人多見怪不怪,但係以往十分暢順嘅落馬洲皇崗口岸,失驚無神塞人塞得好緊要,落馬洲關口翻新緊,人多咗迫啲唔出奇,奇就奇在向來效率更高嘅皇崗海關,都出現旅客滯留嘅問題。同啲職業司機傾開,佢哋話近排多咗好多內地旅行團經皇崗過境,唔塞人就有鬼囉。
蘭西