星戰LEGO呢對拍檔，只要走埋一齊，全世界嘅戲迷、小說迷、積木迷都一定乖乖朝拜。從星戰4、5、6集入面嘅太空船萬年鷹，到前傳I嘅赤武神公仔，全部都被人大掃特掃。再加上近年BEARBRICK帶起積木公仔熱潮，唔少人買一大盒飛船LEGO都係為咗入面嘅積木公仔，單單一隻積木公仔都可以炒到成$50-$100一隻。據熟悉星戰產品嘅人士透露，今次《星戰前傳II》嘅尤達、都古同JangoFett都必定大受歡迎，唔想捱炒價，就要飛快撲貨。
記者：張穎倫
攝影：陳穎、周旭文
呢套LEGO包括尤達大師、都古、電子炮同都古嘅飛船座駕。尤達大師雖然雙腳關節唔可以郁，但只要見到佢拎起激光劍，就男女通殺。而奸得嚟又極有步驚雲Feel嘅都古，誓要同尤達從電影鬥到做積木，而電子炮同都古嘅飛船座駕外形更做得非常神似。
售價：$139（吉之島）
話晒今集叫複製人侵略，複製人白兵CloneTrooper當然唔可以睇小，而且更有埋超級戰鬥機械人同絕地武士，希望靠人多嚟討你歡心。而且呢架共和國武裝直升機更係今集最大型嘅LEGO，裝備夠晒多，值得珍藏。
售價：$1,199（吉之島）
主角阿拿堅嘅積木公仔當然多人捧場，但正當各Fans都以為佢會同女友阿美達娜一齊登場時，佢竟然同埋2個突斯肯游擊隊（TuskenRaider）嘅嘍囉出現，夠晒騎呢！當然兩名嘍囉單憑盾牌同一個哨站，就想攔截飛緊高速摩托車嘅阿拿堅，又確係妄想。
售價：$139（吉之島）
尤達拎劍Look未出之前，JangoFett一直係今集最期待嘅角色。眼見人氣下滑，今次更拖埋喺4、5、6集中最受歡迎嘅仔仔BobaFett出場。再加埋座駕奴隸機一號配備嘅旋轉雷射槍、音速炸彈等各樣武器，誓要從尤達手中搶番班Fans！
售價：$659（吉之島）
除咗傳統LEGO人仔之外，近年推出嘅13吋大Figure系列亦有唔少人捧場。今次揀選銀河系中最出名嘅捕快JangoFett出場，唔單止關節活動幅度大，而且背包上嘅火箭亦可以發射，玩法比人仔更多。
售價：$389（吉之島）
近年日本LEGO同可口可樂經常都推出特別版積木大受歡迎，事關只喺日本發售，其他地方貨源極少，再加上可樂迷亦數量龐大，所以要集齊確係唔易。今次更襯日本有份舉辦世界盃，推出總共30款可樂特別版LEGO，全部對應其他足球LEGO，等你可以放上之前嘅球場一齊玩。不過包裝密封，想揀款的話只可以用手隔住膠袋慢慢摸，或者靠運氣。
之前推出嘅足球LEGO都冇推出專門射12碼嘅發球器，有咗佢就可以增加不同玩法。另外，全套特別版中亦有總共10位可樂隊成員，有齊前鋒、中場同後防，等你多一支球隊同朋友鬥波。而呢位就係9號前鋒，請多多指教。
前鋒、射球器售價：各$15（奇趣天地）
日本人的確有生意頭腦，喺球場LEGO之外，話咁快就諗到小食亭LEGO擺埋一齊，更加埋有熱狗女郎，為剛陽味十足嘅足球LEGO加番點柔情，最搞笑係小食亭連2樽可樂，而熱狗女郎就有珍寶腸同$100現金，造型嬌俏。
熱狗女郎、小食亭售價：各$15（奇趣天地）
售賣點
吉之島（24527333）
屯門屯順街一號屯門市廣場一期地面高層及一樓
奇趣天地（23654692）
紅磡黃埔花園金柏苑商場5號地下