小K自外國留學歸來，唔去大公司打工，直接返老頭子間廠做工，由中層管理人做起。以前啲細路未必肯繼承父業，鍾意到外資跨國集團打工，或者去會計師樓考會計師牌，以為咁樣係自食其力，可以獨立生活，唔使靠父蔭。不過呢幾年搵工困難，就算搵到都冇保證可以做得長。被裁之後，咪一樣死死氣跟老竇做事學師？小K係醒目仔，睇清時勢，返到嚟香港即刻諗到自己英文、電腦兩方面都叻過老竇，可以對家庭企業有貢獻，一於費事喺出邊闖蕩，幫老竇擴闊生意網。
呢日見佢匆匆忙衝落中環地鐵站，問佢做乜咁趕，小K話要去滙豐上堂受訓？點解滙豐要訓練佢？學費貴唔貴呀？小K話：「可能好貴㗎！滙豐要推行網上投標，搞ebidding。我哋要提供服務，以前要寫『標書』（tender），滙豐話以後要慳番啲時間，請啲供應商透過互聯網，即時就每一樣服務落標，我哋首先就要去『奧運站』滙豐上堂，學習網上投標程序同埋注意事項。」
咦，咁樣可以提高生產力噃，好事嚟㗎！小K嘆一口話：「即時網上落價，我哋嘅壓力好大，一定係鬥平鬥到冇肉食，一下唔小心重可能會蝕本。」小K所言有理，不過美國大公司啲供應招標，已開始咗互聯網上進行，亞洲啲大公司遲早學到十足，競爭嘅本質與形式都咁激烈，你話以後啲物價點會上升得快吖！