林嘉欣在港發展年多，備受不少香港導演賞識，原本為此欣喜若狂的她，卻因為有傳聞將她的事業發展，與星皓老闆王海峰的緋聞連在一起，而顯得有些不高興，認為自己被人看扁了。
「當初發掘我嚟香港拍戲嘅係爾冬陞，後來我再拍《異度空間》亦係佢搵我嘅，根本同峰哥（王海峰）冇關，我都係接咗許鞍華部戲先簽星皓。其實我同邊個拍拖都好，我做事一向問心無愧，唔會將感情同公事撈埋一齊。」
林嘉欣早前回加拿大的家度假，剛巧其老闆王海峰亦遠行不在港，兩人的戀聞正鬧得熱烘烘，空穴來風，真的無因嗎？
「我返咗加拿大探親，咁佢（王海峰）有冇講畀你哋知佢去咗邊？如果你係都要問我同佢將來有冇發展嘅可能，呢個問題我都唔識答你。」
但問到林嘉欣是否有意中人時，她卻爽快地說：「有，但呢個人喺香港定外國，我就唔會講。」
外貌老成的王海峰今年才二十八歲，與二十四歲的林嘉欣年紀相若，究竟林嘉欣對這個老闆又有何看法呢？
「峰哥呢個老闆好認真，有冒險精神，佢對電影真係好有誠意，唔係有好多個老闆肯攞咁多錢出嚟拍有誠意嘅電影。我覺得佢對公司任何藝人都一樣咁好，如果外間人覺得佢偏袒我，對我或佢甚至公司其他藝人都係唔公平嘅。
「其實如果我鍾意一個人，我唔會理佢身份係乜，最緊要係兩情相悅，人哋鍾意講乜嘢是非，我都唔會理。不過峰哥成日笑我又肥又矮，你咁都會信我同佢嘅緋聞呀？」
來港發展前，林嘉欣在台灣有一位男友，但在她來港拍《男》片後，林嘉欣便主動向對方提出分手。
「我覺得同呢個男仔一齊，係出於互相關心多過愛情，思前想後，唔想阻人時間，所以我就主動話分手，𠵱家大家重保持朋友關係。」