羅嘉良日前飛去上海，為即將開拍嘅內地時裝劇試造型。
導演重安排劇中所有演員去佢屋企食飯同傾劇本，嘉良今次更初會劇中老婆——「國產郭羨妮」李郁。
來自西安嘅李郁今年二十四歲，兩年前同經理人瓊瑤簽約，同趙薇、林心如做同門師姐妹。
長髮、大眼同下巴尖尖嘅李郁，樣貌竟然同港姐冠軍郭羨妮有幾分相似。
而李郁以前亦曾參與古巨基主演嘅劇集《情深深．雨濛濛》，佢話瓊瑤喺開拍《天上人間──還珠格格3》之前，亦安排過佢喺套劇度演格格，但佢為咗同嘉良合作，竟不惜放棄呢個機會，寧願做嘉良老婆。
李郁第一次同嘉良碰面，佢話：「嘉良沒有架子，很好人，也很樂意照顧新人。」
記者朱芷瑩上海直擊
出爐金像影后張艾嘉同佢老公噚日現身萬豪酒店，睇佳士得預展，佢專攻睇瓷器。問佢會唔會投番件珍品獎勵自己，佢笑住咁話：「個獎咪係最大嘅獎勵囉，唔使再嘥錢競投啦！」至於獲獎後有冇多咗人搵佢拍戲？張艾嘉話重未有喎。
佘詩曼（阿佘）噚日返無綫電視城，為新劇《帝女花》開工。問佢俾人影到深夜出入化妝師江中平屋企，重話佢兩個同居件事，阿佘一味唔認，佢話：「佢只不過係我工作上嘅拍檔。我都識咗佢幾年，咁我工作時間唔定時，有時會去佢屋企化妝，唔通叫佢嚟女仔屋企咩？咁咪重唔方便。」
呢個圈好多夫妻喺人前恩愛、人後就喺屋企打餐飽。好似圈中有對年輕夫妻，咪睇女嘅斯斯文文，佢嫁人前已經有同人打交嘅前科，而佢個外形同樣好斯文嘅老公，原來係有暴力傾向，所以兩個人婚前同婚後都已經試過無數次炒大鑊，甚至打交打到連鄰居都知。不過佢哋可以成為夫婦，夾嘅地方除咗都有暴力傾向外，重係扮嘢一族，所以每次出嚟都扮到好煙韌，一副恩愛夫妻模樣，呢對小夫妻可謂物以類聚。
葉蒨文（Sally）噚日以義工之星身份，出席「2002年全球青年服務日」開幕儀式。問佢點睇王菲、霆鋒分手，Sally話：「分手我都有試過，咪當係人生經歷囉！」提到近排霆鋒惹上麻煩，佢就話：「人難免有做錯，年輕人唔好有樣學樣，應該衡量過先做。」
賭王何鴻燊四姨太梁安琪，噚日現身金鐘，佢先去佳士得參觀珍品，逗留半個鐘就走咗，跟住佢去咗Cova餐廳，遇見喺度歎緊茶嘅謝賢。
對於近日葡京頻頻輸錢，四姨太不願回答，佢重顯得頗煩躁咁話：「哎吔，你哋唔好阻住人啦，呢啲嘢唔好問我。」
譚炳文（炳哥）日前喺葛量洪醫院做心臟手術，噚日炳哥由女兒陪同出院。炳哥精神同面色都明顯好咗，佢話：「手術個傷口要十幾日先埋口，𠵱家我唔可以接觸電波強嘅嘢，講手提電話都要喺冇傷口嗰邊嘅耳仔講，如果唔係就會影響到個傷口。」
容錦昌噚日知道陳小春會去銅鑼灣地帶，為商台做戶外直播，佢專登去「踩場」。
好耐冇見嘅容錦昌瘦咗啲，佢噚日出現原來係想透過記者，發放佢有意復出嘅消息。容錦昌話：「我已經忘記以前嗰啲唔開心，唔會再做儍事同飲酒。」容錦昌重話之前周星馳都搵過佢拍電影《少林足球》，但係佢因為有事所以推辭咗。