現年五十四歲的汪明荃（阿姐），上月到醫院割除乳房腫瘤，現正康復中。阿姐昨日到上環綵緋舞台劇，病後的她略見消瘦，她更笑言自己的乳房仍在。
汪明荃（阿姐）上月初秘密入院接受割除乳房腫瘤手術，現正康復中。阿姐昨日到上環文娛中心，為舞台劇《如夢之夢》綵排。病後的阿姐雖然消瘦了一些，但精神不錯。
阿姐昨日親自駕車往綵排，薄施脂粉的她精神很好。阿姐對於患乳癌一事，大方承認。問她現在身體的情況，阿姐說：「癌細胞分好多種，有啲要化療，有啲要電療，我嗰種係超好嗰隻，壞細胞好細粒。我平均兩年會做一次身體檢查，嗰次係第一次婦科檢查乳房，好彩及早發現。
「當時係二月尾，我好快決定做手術，醫生建議我割晒啲壞細胞，𠵱家都清晒，半年後先去覆診，胸部個傷口約有一吋長，傷口都已埋口，不過我感覺裏邊重腫腫哋，我見過割出嚟嗰啲壞細胞，好似啫喱。」
阿姐早前動完手術，還未拆線便到北京參加政協閉幕禮，她說：「我上咗飛機先知驚，啲工作一早安排咗唔可以推。我唔同朋友講，因為唔想大家擔心，呢次咁快康復，係因為我平時都有做運動。」
問阿姐發現患乳癌後，可是第一個致電男友羅家英？她說：「算係。」阿姐這次動手術是否要割除乳房？她說：「我個胸重喺度！」問阿姐患乳癌的是左胸或右胸？她說：「唔使講咁詳細，呢啲同大眾冇關。」
阿姐說起傷口情況，不時指着右胸，未知可是右胸動過手術？病後的阿姐，人生觀亦改變了，她說：「我覺得要積極生活，珍惜生命，最緊要身體健康，工作係我嘅推動力。」
沈殿霞（肥姐）對於阿姐患癌一事，原來毫不知情，昨日肥姐在電話中說：「我啱啱先至同佢通完電話，佢真係好好嘢，我有少少膽石就呱呱嘈，佢就好冷靜，好堅強。」
李司棋早年亦戰勝癌魔，她昨日說：「乳癌𠵱家年輕化，防不勝防，佢選擇唔講畀人知比較好，但話畀人聽就會多朋友關心。」
採訪、攝影：駱華齡、李珮洳