周梁淑怡果然坐言起行，前日先話鄭大班斷章取義，亂咁引用佢寄畀商台老闆何驥嘅私人信件，揚言要公開信件以示清白，話口未完，噚日即刻將佢喺四月十七日寄畀何老闆嘅投訴信、五日後何老闆嘅回信、連同佢最新嘅公開信，一齊寄晒畀全港各大傳媒。
到底周梁有冇施威要商台老闆炒鄭大班？八方喺第一封信裏面搵唔到，但周梁確實指摘鄭大班「唯一的興趣就是發動毫無事實根據的人身攻擊，企圖迫受害者埋牆角。」又指大班在節目中話佢「無良、卑鄙無恥」係誹謗。信尾重話，負責任嘅廣播機構都唔應該容忍以「人格暗殺」（Character Assassination）嘅方法去爭取聽眾。
何老闆嘅態度點？佢嘅回信話，主持意見唔代表電台立場，又話唔信大班用咁嘅方法去提高收聽率，果真係咁，全香港多數人都唔會同意大班嘅立場。好清楚，撐大班。
周梁第二封信無再糾纏應唔應該容忍大班嘅行為，但仍批評大班毫無根據咁公開點名攻擊，係對佢精神上嘅暴力侵犯。不過，雖然周梁話係私人信件，但就用咗有立法會議員「周梁淑怡辦事處」信頭嘅信紙，咁又算唔算有施壓成份？
E-mail：