【本報訊】距離二○○二年世界盃足球決賽周尚餘一個月有多，但香港睇波熱愈演愈熾，日韓世界盃睇波團全城熱賣，過萬元的旅行團出現賣斷市。有旅行社覷準這股足球熱，搶先開辦英格蘭超級聯賽冠軍前哨戰──曼聯對阿仙奴的睇波團，反應不俗。無暇前往現場觀看賽事的球迷，則提升家中的電視機和錄影機，令本港電器零售市道出現反彈。 記者：蔡元貴
第一家發售日韓睇波團的康泰旅行社，開辦了十九個世界盃旅行團，至今已有十三團滿額，餘下未滿額的睇波團，也僅剩餘一至兩成名額。最早沽清的世盃團是六月十一日出發的中國對土耳其分組賽，團費一萬二千元的四日團，在短短數日內已告爆滿。
睇波去旅行忽然成為香港人的熱門消遣，現時已有十間旅行社開辦世盃團，這是歷屆世界盃從未出現過的。有旅行社乘着這股足球熱，推出另類睇波團——曼聯終極爭霸七天團，五月七日出發，觀看英超球隊曼聯本季最後兩場賽事，團費一萬六千八百元。
經營曼聯團的環宇足球遊負責人江國榮指出，全團只有二十四個名額，已售出八個名額：「曼聯係全世界擁有最多球迷嘅球會，每場球賽嘅波飛都好難撲得到！」兩場賽事包括五月八日對阿仙奴、五月十一日對查爾頓。
睇波團異軍突起，但香港旅遊業議會總幹事董耀中卻認為是好壞參半：「今屆係中國隊首次打入決賽周，又係首次喺亞洲主辦世界盃，所以睇波團今屆特別受歡迎，但係我擔心一般非睇波團會大受影響。」他解釋，世界盃導致日本及韓國的酒店預訂率奇高，房價飆升，恐怕一般日韓團都難以成行。
江國榮估計，世界盃決賽周期間，大約會有二千名香港人隨團觀戰，去屆則只有數百人：「我哋有位顧客重打算睇五場，門票連機票同酒店夾埋十幾萬。」董耀中則提醒消費者，必須清楚睇波團包含的是哪一場球賽、哪一個級數的門票。
未能「應戰」的球迷，惟有安坐家中「隔岸觀火」。華仁會電器行負責人羅仲明說，本月錄影機及電視機甚暢銷，錄影機銷量上升了兩成，七間分店平均每日售出一百部。電視機則上升一成，每日售出二十五部：「今次世界盃好多場都打日頭同黃昏，啲人要返工睇唔到直播，所以錄影機需求大增。」