現年二十四歲的林嘉欣，曾在台灣發展七年，星運不濟的她要兼任補習老師賺取生活費，節衣縮食七個年頭後，去年與男友分手的林嘉欣，來港演出許鞍華電影《男人四十》，結果為她贏得香港電影金像獎的「最佳新演員」和「最佳女配角」兩個獎項，聲名即時大噪。
在台灣樂壇蹉跎了七年光陰的林嘉欣，正當明星夢碎，去年準備收拾心情返回加拿大重覓新工作之際，剛巧爾冬陞找她來港為許鞍華的電影《男人四十》試鏡，結果，在上周日舉行的香港電影金像獎頒獎典禮中，林嘉欣憑《男》片一口氣奪得「最佳新演員」和「最佳女配角」兩個獎，一夜之間成為影壇新貴。
「嗰晚攞咗兩個獎，我真係諗唔到，許鞍華導演喺我攞獎後同我講：『𠵱家你一定感覺到有好大壓力，我都有過你嘅經歷，足足用咗三年時間先可以平復到心情，但你千祈唔好鑽牛角尖，畀太大壓力自己，如果唔係就唔可以還原，回到根本處。』聽完佢呢番話，我好感動。
「其實我再睇番《男人四十》，我覺得自己做得唔係咁放，如果畀我再演多一次，一定可以做得好一啲。」
林嘉欣這次一舉為經理人星皓公司取得兩個獎，本來已是公司寵兒的她，現在更是萬千寵愛在一身，有高層向她表示未來其拍片路向，一定會以多拍大製作為主，但這個決定，卻不是林嘉欣所願。
「如果你問我想拍乜嘢類型嘅戲，我會話畀你聽，我幾鍾意拍一啲小品電影，唔一定要拍大製作。我上年開始嚟香港發展，公司又錫我，自己都覺得幾幸運。嚟香港之前，我都冇諗過會有咁多機會同啲好導演合作拍戲。」
一個人在香港生活的林嘉欣，工作以外的時間喜歡躲在家中看書或看VCD，一於奉行無事出街少破財的真理。
「喺香港我朋友唔係咁多，大部分都係拍戲識嘅工作人員，唔知係咪以前喺台灣慳慣，所以自己賺到錢都會儲埋，以備不時之需。平時我出入都係得幾百蚊喺銀包，今日見你，我銀包都係得三百蚊。
「千祈唔好以為我係女明星就唔敢搭公共交通工具，平時出街我都係搭地鐵，我唔怕面對群眾嘅眼光，大家都係人啫！只不過我嘅職業係演員，但我希望可以繼續用自己喜歡嘅方式生活，做人冇咗自我先係最辛苦嘅事。」
撰文：陳月媚 攝影：林德雄
服裝提供：I.T 化妝：琪琪 髮型：KenyiNg（IIColpo）