林嘉欣八歲時，定居於加拿大的雙親簽紙離婚，她的一姊兩妹選擇了跟父親，擔心母親寂寞的林嘉欣，則選擇獨自跟隨母親生活。直至十五歲那年，林嘉欣在加拿大認識了台灣經理人張洪量，就在那一年，她決心隻身赴台闖天下。
「一個人走去台灣發展，𠵱家諗番都覺得自己好大膽，出完第一張唱片之後，我同經理人張洪量搞到好唔開心，後來改簽寶麗金唱片出自己嘅第二張唱片，點知唱片出街第一日已經收到張洪量嘅禁制令，我重畀佢雪藏咗幾年，搞到我日子好難捱。
「喺台灣呢七年，因為唔想伸手問屋企人要錢，所以我喺台灣幫啲小孩子補習英文搵外快，呢幾年我真係使一個錢都會諗得好清楚。媽咪擔心我，間中會喺加拿大飛嚟探我，而我喺日本嘅姐姐，喺加拿大嘅爹哋同姊妹不時都會寫信畀我，一個人喺異鄉收到家人嘅信，嗰種興奮係講唔出嘅，所以每次返到加拿大見親人，我都會忍唔住要衝上前攬住佢哋。」
林嘉欣在台灣發展的七年，讓她學會了獨立，凡事喜歡親力親為，所以現在她一個人在香港生活，如交家裏的雜費、添置服裝等事，她亦不會勞煩助理去做。
「由細到大我都好識照顧自己，基本上我對生活要求好簡單，唯一戒唔到嘅係飲奶習慣，直情係當水飲，每日最少飲一公升奶，可能因為咁，我先至會最近去完加拿大返嚟又肥咗啦！不過為咗上鏡可以好睇啲，我已經決心減肥，但減肥歸減肥，奶就照飲㗎！」
相約林嘉欣到赤柱訪問當日，攝影師要求她坐在欄杆上拍照，林嘉欣忽然擺出一個拗腰的姿勢，眾人正待提醒她小心之際，翻身做第二個動作的林嘉欣已整個人跌下來，膝蓋先落地，那響亮的一聲「轟」，真是十分驚人。
眾人扶起林嘉欣後，即提議稍作休息，但雙腳擦損流血又瘀了大片的她，雖然一臉痛楚表情，她還是說：「唔緊要，我哋繼續影相。」
這個女孩子，成功有理。