陳奕迅（Eason）昨日首次親自剖析弄傷下體一事的來龍去脈，他說：「成件事根本同我動作大唔大冇關，當日個台係用木板搭高嘅，打直塊板高過打橫塊板，台邊好似有少少圍欄咁，我行去台邊掟帽落台，隻腳就踩咗上去凸起塊板度，點知釘得唔實，成塊板跣低咗，我就俾佢扯咗落去。」
Eason續道：「雖然我當時有啲痛，但入後台都覺得冇乜嘢，重幫啲學生簽名。我有去過廁所㖭，都冇乜嘢，不過上車之後我覺得有啲隱隱作痛，返到酒店愈嚟愈痛，工作人員話我標晒汗，叫我不如去checkcheck，去到醫院先知道咁嚴重，即刻敷冰同埋打針。」
問Eason可覺得自己黑仔，他說：「好似劉德華話齋，意外嘅嘢冇得好講，惟有自己小心啲。話我嗰晚食咗藥，呢啲都係攞嚟講，有事發生就好多無謂嘢寫㗎啦！好似話我當日着黃色衫咁，根本係學生會嘅制服，我諗住着佢哋嘅衫同學生玩得開心啲，件衫咁啱係黃色啫！公司從來冇落命令叫我着黃色或者藍色衫，邊有咁迷信㗎！」