【本報訊】前日就兒子謝霆鋒涉頂包事件到廉署協助調查的謝賢，前晚十一時許，與前妻狄波拉到兒子位於中環的Band房，帶同消夜給謝霆鋒醫肚，及至昨日下午三時又在金鐘太古廣場的Cova餐廳歎咖啡，問他前日何以到廉署協助調查時，謝賢說：「我係佢老竇，拉姑（狄波拉）係佢老母，都有小小責任問吓嘅，你哋唔好再問啦，我唔會講㗎。」那麼拉姑是否亦曾到廉署協助調查？謝賢連聲否認，強調只有他一人而已。
記者問他Cova與廉署的咖啡，哪裏比較好飲時，他即笑說：「梗係呢度好飲過嗰度啦。」對於今後有何打算，以及他是否需要再到廉署協助調查時，謝賢表示不清楚，暫亦未有甚麼打算，他說：「等自己一路一路去，佢哋（廉署）話幾時完咪幾時完囉，其他嘢我真係唔知，第一，呢啲嘢唔講得，第二，又唔係我控制得到，總之霆鋒𠵱家心情幾好，照常做嘢，唔會為咗乜嘢而唔開工。」
昨日謝賢的馬匹「遊戲人生」在沙田馬場出賽，一度被視為大熱門，雖然「遊戲人生」最後落敗而回，但昨日由始至終也未見謝賢在馬場出現，謝賢解釋是這個時候不想太過高調所致，若然馬匹勝出，他會找朋友代拉頭馬。
問他霆鋒可曾擔心坐監時，謝賢拒絕回答，指記者如何追問，他亦不會回答的。早前謝賢與狄波拉及謝霆鋒，到泰國拜神和拜會白龍王，未知白龍王可有給謝霆鋒甚麼指引？謝賢說：「冇乜嘢，同佢傾吓偈啫，佢話唔使擔心，要擔心都係擔心記者亂寫嘢，你哋唔好煩佢，佢好慘，佢噚晚去Band房又有十幾個記者喺度，佢走你哋又追，佢又會開快車，你哋煩住佢，搞到佢冇晒自由，希望大家畀啲自由佢啦！」原來，謝賢曾勸過謝霆鋒不要開快車，奈何他終日被記者追蹤，迫使他開快車避開。