上個禮拜四伏勝打開某份報紙，正想睇吓本地公司通告嘅時候，見到內頁連續7版用黑色印咗幾隻中文字，其中3版寫住「廣東科龍致意」，另外4版則寫住「南華集團致意」，驟眼望落去好似訃文咁，真係大吉利是。當日有啲記者朋友八到消息就通知伏勝，話嗰邊出現技術問題，原本嗰7版紙係用嚟登科龍（921）同南華集團（265）嘅業績，但係由於到截稿時重未收到兩間公司嘅原稿，結果惟有將嗰幾版改做致意版。
有啲口痕嘅朋友就話，兩間公司業績都咁差，搞到班小股東個個哭晒股喪，就算要改版都應該寫為「廣東科龍向各股東致歉」，同埋「南華集團向各股東致歉」，起碼有啲誠意。
翻查紀錄，原來兩間公司都係由安達信幫佢哋做核數，而今次科龍喺公布業績之後，班管理層即刻好高調咁質疑安達信過去做嘅財務報告，加埋美國嗰邊Enron事件重未完事，今次安達信真係有排煩。
伏勝喺個多月前講過光通信國際（603），唔經唔覺已經升破咗當時嘅目標1毫2，喺上個禮拜初，光通信公布咗新嘅投資路向後，個價更好似坐火箭咁直標到去1毫半水平，之後重搞埋第一輪批股，雖然計番個批股價嘅折讓唔係咁大，只係得9%左右，不過反應就非常之熱烈。
有知情人士話今次批股只係落咗去幾個人身上，有啲行家更嘗試計過，發覺只係有千零萬股流出街，唔怪得隻股復牌之後，個價就好似練咗金鐘罩咁插都插唔落。個知情嘅朋友重話，要加倍留意呢隻股，因為上次批股反應太好，有好多國內嘅大孖沙攞唔到貨都話會繼續喺個市度吸貨，聽講重話會有成億元嘅錢調落去㖭。聽落好吸引，只係唔知傳聞有幾真。
伏勝